الصورة النمطية للصعيد إنه منطقة معظمها جبال وصحراء زي ما اتعودنا نشوف في الأفلام، ولكنه في الحقيقة من أكتر الأماكن المليانة بالطبيعة والكنوز الأثرية الموجودة من آلاف السنين، وتستحق فعلاً إننا نزورها ونسلط عليها الضوء، وحبينا بنقدم لكم قائمة بأهم المعالم الموجودة في صعيد مصر.
جزيرة النباتات في أسوان
الجزيرة بتضم عدد كبير من الأشجار والزهور بيصل عمرها لمئات السنين، لدرجة إن في أشجار معمرة بتغرس جذورها في الأرض ولم تتأثر بأي عوامل جوية أو تغيرات مناخية، كمان موجود فيها زهور وأشجار نادرة زي شجرة “الست المستحية” وشجرة الماهوجني ومردقوش ودوم بالم، ومش موجود زيها في أي مكان تاني.
ممكن تقضي يوم كامل في الجزيرة من غير زهق، وده لأن فيها مطعم بيطل على النيل مباشرة، بأسعار مناسبة وفي متناول الجميع، وممكن تتمشى في الممشى السياحي على ضفاف النيل أو تأجر مركب لوقت معين وترجعك تاني لمكان الجزيرة أو ممكن بيها تزور القرية النوبية ومتحف النوبة، لإنهم قريبين من الجزيرة.
الجزيرة مفتوحة لاستقبال الزوار من الساعة 8 صباحًا لحد الساعة 5 مساءًا، بأسعار تصل لـ 100 جنيه للمصريين و250 جنيه للأجانب، وتقدر تروحلها من خلال أي وسيلة مواصلات لمنطقة مرسى الجزيرة جمب نادي التجديف، وبعدها تتوجه لمدخل الجزيرة وتمشي بعدها حوالي 10 دقائق، أو ممكن عن طريق فلوكة، تصل إلى الجانب الجنوبي الشرقي من الجزيرة الصغيرة.
معبد رمسيس التاني في سوهاج
من أكتر المعابد المميزة في الصعيد، وموجود في مدينة أخميم بسوهاج، وبيحتوي على تمثال الملكة ميريت آمون، زوجة الملك رمسيس الثاني، والتمثال مصنف كأطول تمثال لسيدة تاريخية في العالم.
المعبد تم اكتشافه بالصدفة البحتة، بعد ما أصدرت الحكومة المصرية قرار ببناء معهد أزهري في المنطقة واكتشف العمال بالصدفة وقت الحفر إن في تماثيل فرعونية تحت الأرض، وقرروا يبلغوا هيئة الآثار المصرية، ووقفت العمل فورًا في المنطقة مع استكمال الحفر للبحث عن باقي الآثار، واكتشفوا بعدها تمثال ميريت الثاني، وتمثال للملك رمسيس التاني، ولكنه كان محطم تمامًا وتم إعادته لهيئة الآثار لتجميعه مرة تانية.
هيئة الآثار قررت إخلاء جزء كبير من مقابر منطقة أخميم ونقلها لمكان آخر لاستكمال عملية الحفر والتنقيب عن باقي الآثار المتبقية، وبعد البحث والحفر لفترات كبيرة، اكتشفوا وجود تماثيل فرعونية أخرى وتم نقلها لمخازن المتاحف.
الزيارة متاحة طول أيام الأسبوع من الساعة 7 صباحًا لحد الساعة الـ 5 مساءًا، بسعر الدخول 100 جنيه للسائح الأجنبي و50 جنيه للطالب الأجنبي، و30 جنيه للطالب المصرى.
معبد فيلة
المعبد موجود حاليًا في جزيرة “أجيليكا” في أسوان والجزيرة بتطل على النيل مباشرة، بعد ما اتنقل من جزيرة الفيلة في الستينات، ومن وقتها قررت الحكومة تفكيكه لقطع صغيرة ونقله لمكان آخر بعيد عن الفيضانات، ولكن التكلفة كانت عالية جدًا فقررت الحكومة عرض الموضوع على منظمة اليونسكو وقررت تتبنى فكرة نقل المعبد لمكان تاني.
اسم “فيلة” معناها “فيلاي” باللغة الإغريقية أي “الحبيبة” والمعروفة في الأدب العربي باسم “أنس الوجود” بسبب أسطورة أنس الوجود في قصص التراث الشعبي “ألف ليلة وليلة”، وبيعود بناء المتحف للملك بطليموس الثاني، لما بناه لزوجته إيزيس، وخصص فيه حجرة للولادة “الماميزي” للاحتفال بولادة ابنه حورس، والمعلومات موجودة على نقوش المعبد على شكل كهنة بتقدم قرابين لعائلة الملك أوزوريس ووزوجته إيزيس وابنهم حورس.
بالنسبة للتذاكر، الأسعار تصل لـ 300 جنيه للسائح الأجنبي، و 200 جنيه للمصريين، وتقدر تروحله من خلال فلوكة في النيل في وقت قصير لا يتعدى ربع ساعة.
قبة أبو الهوا في أسوان
جبل الهوا أو “قبة أبو الهوا” من المزارات السياحية الأساسية في أسوان، الجبل بيطل على الضفة الغربية للنيل وبيضم مقابر منحوتة داخل الجبل، عددهم أكتر من 95 مقبرة، تعود للعصور القديمة والوسطى للحضارة المصرية القديمة، ومرسوم عليها نقوش بتبين حياة المصريين القدماء؛ زي مشاهد ذبح الأبقار وصيد السمك وصيد الطيور.
تقدر توصل للمتحف بسهولة عن طريق أتوبيس في الطريق البري، لكن الأسهل هو القطار، لأن المحطة موجودة أمام الجبل مباشرة.
بالنسبة لأسعار التذاكر، 250 جنيه للسائح الأجنبي، و100 جنيه للمصريين، 60 جنيه للطالب المصري الحامل لكارنيه يثبت إنه في مدرسة أو جامعة.
جزيرة الموز
الجزيرة موجودة في البر الغربي بمحافظة الأقصر، على مساحة 5 فدان، وبتتنوع فيها أنواع وأشكال الشجر؛ سواء التين أو الجوافة أو العنب، وفيها ركن مخصص للحيوانات؛ زي الثعالب والسلاحف والتماسيح والقرود، وتقدر تقضي في الجزيرة اليوم كامل.
المكان بيقدم طبق كبير لكل زائر للجزيرة، بيتكون من تين وتوت أبيض وموز وعنب كنوع من الضيافة، بالإضافة لوجود مطعم الجزيرة، وبيقدم أكل صعيدي تراثي؛ زي المشويات والمحاشي واللحوم بأنواعها، وماتنساش تشرب شاي على الكانون.
الطريق الوحيد للوصول إلى الجزيرة هو إنك تاخد فلوكة نيلية لمدة ربع ساعة، والطريق لها في حد ذاته رحلة ممتعة في وسط النيل، بنقاءه وطبيعته الزرقاء في صعيد مصر.
أماكن كتير في الصعيد للأسف مش معروفة بشكل كبير، لكن الصعيد فيه كنوز طبيعية تسحر زوّاره ولازم نتكلم عنها ونروّج للسياحة فيها.
