مع الكنافة والقطايف وبلح الشام ووقت الأنتخة على الكنبة لمتابعة المسلسلات وفي لحظات هادية وصافية، تظهر لك شخصيات في الأعمال الرمضانية، بكمية من الشر والحقد والخداع يخليك تسأل هي الناس دي بتعمل إيه؟ هو فيه كده في الحقيقة؟ ولأنهم أبدعوا في أدوارهم لدرجة خلتنا نكرههم وقلبنا مستريح، جايين النهارده علشان نخلي الجمهور يدعي عليهم وفي رمضان الدعوة مستجابة.
خضر – غدر الأخوات في أبهى صورة
من أول الحلقات وأنت مش عارف تمسك لخضر فتيحة تيمة معينة، مش عارف تكرهه ولا تحبه تتعاطف معاه ولا تقوله إيه اللي بتعمله ده، وفضلنا معاه في منطقة رمادية أول كام حلقة، بس في الحلقات الأخيرة اتأكدنا إنه ماينفعش يكسب تعاطفنا معاه من هنا لآخر رمضان، وده بعد المؤمرات والجرائم اللي عملها، ورقة وقلم وأكتب ورايا، أولهم حرق بيت أخوه نصار (أحمد السقا) وكان هيولع في ابنه وقتل صاحب عمره ولفق لحبيبة نصار قضية أداب علشان يطفشها ويبعدها عن سكة أخوه، وكل ده بس علشان مصلحته وبرغم أن طارق لطفي أبدع في الشر للمرة الرابعة بس كل واحد فيهم غير التاني.. وكده كده أنت اتعلم عليك يا خضر وأقلقوا بعد كده من الابتسامة الصفرا.
نسمة الكاريزما – غدر الأخوات الجزء التاني
نسمة الكاريزما دي بقى تخطت كل الحدود، مش عارفين هل هي تخطت حدود الأفورة ولا في ناس ممكن تعمل كده في أختها، شخصية ماعندهاش أي مباديء ممكن تعمل أي حاجة في سبيل الشهرة والوصول للتريند ممكن تدوس على أي حد في سبيل ده، غل ونفسنة من أختها غير طبيعي وصل لأعلى مراحله أنها تتبلى على عريس أختها وتطلع عليه سمعة علشان ماتتجوزش وبعديها عادي تاخد أختها في حضنها .. صورتها وهي بترقص وفي خناقة بانت على حقيقتها الكاملة لأختها وطلعت كل الحقد لأختها.. الناس اللي بتتكلم عن غدر الصحاب تيجي تشوف غدر الأخوات.
صلاح – عدى مصطفى أبو حجر
كلمة “كلهم مصطفى أبو حجر ” دي قليلة على صلاح في نعمة الأفوكاتو واللي قام بدوره أحمد زاهر، هو عدى أبو حجر بمراحل، على الأقل أبو حجر اتجوز على مراته وقرر يصلح غطلته في النهاية ويجيب أولاده ويعيشوا مع بعض في فيلم حب البنات، لكن صلاح خان مراته بعد ما طفحت الكوتة عليه وكانت شايلة البيت كله لوحدها وكان زي خيال المآتة، ومش بس كده ده التقيل كله أن الست اللي خانها معاها والمعروفة بـ”سارة مكاتب” نزلت في نعمة ضرب وبدل ما يلحقوها على المستشفى راحوا على المقابر ودفنوها حية.
“ندل، محروم وطماع، وعينه مش مليانة” ملخص شخصية صلاح جوز سارة مكاتب .. أملنا كله واللي هيبرد نار الجمهور هو يدوق علقة زي اللي خدها من محمد رمضان في البرنس بس المرة دي من مي عمر.
علي – نقول فيك إيه ولا إيه
مش عارفين نبدأ منين في الحقيقة يخربيته كله عيوب، بس نقدر نقوول ببساطة أن علي في أعلى نسبة مشاهدة شخصية تتمتع بالسماجة والنطاعة، بيضرب الستات وبيستغلهم وبيصور زباينه عنده في المحل وبيبتزهم بالصور مقابل الفلوس أو أي حاجة تاني ومش بس الزباين الغريبة لأ كمان القرايب وأهل بيته وخصوصًا شيماء (سلمى أبو ضيف) بمبدأ “أعملي اللي أنتي عايزاه.. بس علي هينصص معاكي في أي سبوبة” بس المشكلة أنه أحيانًا في مشاهد صغيرة كده على غفلة لقيناه هش وضعيف .. يعني نقدر نقول عليه شرير بس دمه خفيف.
شريف الفولي – حيث النرجسية
كان طالع في ضيف شرف آه بس قدر يجمع بين كوكتيل بين النرجسية والـ”التوكسيك” ماشفوناهوش على حد قبل كده، بينتقد مراته طول الوقت ومش عجبه حاجة ومش مهتم بيها ولا بيفكر أنه يهتم وماعندوش مشكلة يطلقها بس ياخد دهبها، عنده قدرة أنه يطفي مشاعر ويهز ثقة أي ست معاه، ومفيش مانع إنها تجيب هدية عيد ميلادها بنفسها، لحد ما قدر يستنفذ كل طاقة صبا مبارك (يمنى) وفي لحظة غضب على اسم المسلسل قررت أنها تقتله.. نهاية منطقية متوقعة عادلة بصراحة.
ها قولوا لنا بقى، كرهتوا الشخصيات اللي حكينا عنها ولا لسه؟