مع انخفاض حدة انتشار فيروس الكورونا في مختلف دول العالم، ابتدت الحياة ترجع لطبيعتها، وواحدة من مظاهر حياتنا اللي كانت وحشانا كلنا هي دور العرض السينمائي، والفرجة على الأفلام مع أصحابنا على الشاشات العملاقة.
السعودية والإمارات من الدول العربية اللي أعلنت خلاص فتح السينيمات العادية، وده بعد ما طبقت الإمارات تجربة سينما السيارات بنجاح كبير الفترة اللي فاتت، وده طبعاً مع تطبيق بعض الإجراءات الوقائية في التعامل بين الأفراد.
وعلى الرغم من إن مواعيد عرض الأفلام العربية الجديدة اللي كان مُقرر نزولها في موسم صيف 2020 لسة متحددتش، في أفلام عالمية كتيرة اتحددت مواعيد عرضها خلاص بعد سلسلة طويلة من التأجيلات، ودي قائمة بالأفلام اللي لازم تشوفوها الفترة الجاية:
Unhinged
من أوائل الأفلام اللي هترجع لشاشات العرض السينمائي هو فيلم الإثارة والتشويق Unhinged، الفيلم من بطولة راسل كرو، وهيبتدي عرضه يوم ١٠ يوليو، وهو من إخراج ديريك بورتي، وتأليف كارل إلسورث، وبيشارك في بطولته جيمي سيمبسون و جابرييل بيتمان.
Mulan
فيلم Mulan هينزل السينمات يوم 24 يوليو الجاي، والفيلم ده كان من المقرر عرضه فى مارس اللي فات، بس مع تفشي الفيروس اتأجل. وهو عبارة عن فيلم Live Action من نسخة مولان الكارتون اللي صدرت سنة 1998. الفيلم من انتاج ديزني، وبتدور قصته حول قصة بنت صينية بتتنكر في زي راجل علشان تقاتل في الجيش بدل أبوها المريض.
بتجسد دور مولان الفنانة الصينية ليو يي فاي، وبيشاركها في البطولة دوني ين، وجيت لي، ولي جونج، وجاسيون لي.
Tenet
فيلم Tenet هو واحد من أهم الأفلام اللي هتتعرض السنة دي، هيبدأ عرضه يوم 31 يوليو الجاي، وهو فيلم أكشن وخيال علمي بتدور احداثه حوالين محاولة بطله منع حدوث حرب عالمية ثالثة بعد ما رجع للحياة من جديد بتقنية ارتداد الزمن.
الفيلم من بطولة جون ديفيد واشنطون، وإخراج كريستوفر نولان، مخرج فيلم Dunkirk الفائز بأفضل مونتاج ومكساج في الأوسكار سنة 2018. بلغت تكلفة فيلم Tenet الإجمالية 220 مليون دولار، وبكده يكون الفيلم الأعلي تكلفة في مسيرة نولان السينمائية.
Greenland
بعد ما تم إعلان عرض فيلم Greenland يوم 31 يوليو الجاي بكام يوم، اتأجل تاني ليوم 14 أغسطس. وهو فيلم خيال علمي من بطولة جيرارد باتلر وإخراج ريك رومان ووه، وبيعرض معركة أسرة من أجل البقاء وإيجاد ملاذ آمن في مواجهة كارثة طبيعية وقت حدوث نهاية العالم.
باتلر، ورومان ووه اتعاونوا سوا قبل كده في فيلم الأكشن Angel Has Fallen، وفيلمهم الحالي اتأجل عرضه على الأقل 3 مرات بالتزامن مع الظروف الحالية.
Bill and Ted Face the Music
ومن الأكشن والمغامرة، للكوميديا الممزوجة بالخيال العلمي في فيلم Bill and Ted Face the Music، الفيلم هينزل السوق يوم 14 أغسطس، وهو من بطولة أليكس وينتر، وكيانو ريفز اللي بيجسدوا أدوار الصديقين بيل وتيد اللي هيروحوا المستقبل ويلاقوا نفسهم في صورة آباء في مرحلة منتصف العمر.
Wonder Woman 1984
بعد تأجيل وتغير معاد عرضه أربع مرات، هينزل فيلم Wonder Woman 1984 السينمات يوم 2 أكتوبر 2020، وأحداثه هي عبارة عن تكملة لأحداث فيلم Wonder Woman اللي اتعرض سنة 2017، عن البطلة الخارقة ديانا، أميرة الأمازون اللي لا تقهر.
الفيلم ده هو الثامن ضمن أفلام عالم دي سي السينمائي، وهو من إخراج باتي جنكينز و كتابة جنكينز، مع جيف جونز.