إحنا كمصريين دايمًا عندنا حنين للماضي وانبهار بالأزياء وطريقة الحياة عمومًا اللي كانوا عايشينها الناس اللي قبلنا في الفترات الزمنية القديمة، فأي حاجة تساعدنا إننا نسترجع الزمن ده، زيّ المسلسلات اللي بتتناول الحقب الزمنية القديمة، بتلاقينا automatically روحنا نتفرج عليها علشان نستمتع بالتفاصيل، والحقيقة إن مسلسل قصر النيل اللي بيتعرض في موسم رمضان السنة دي، حرفيًا جابوا لنا الستينات لحد عندنا علشان نقدر ناخد نظرة قريبة من الفساتين والإكسسوارات الـ authentic، اللي رجعونا لزمن عبدالحليم حافظ وسعاد حسني وشادية ورشدي أباظة، وغيرهم من الفنانين والفنانات الكبار اللي كانوا موجودين في فترة الستينات.
نقدر نقول إن أزياء فريق العمل كله، كان في اهتمام كبير بالتفاصيل، وبرغم إن الأزياء اللي شوفناها (لحد دلوقتي في التلات حلقات اللي فاتوا) ممكن تكون مش متطابقة بنسبة 100%، لكن فيهم نفس لمسات الطواقي، سلاسل اللولي ونقشات الفساتين اللي كانت في عصر الستينات. وبالنسبة لفساتين دينا الشربيني، فهي كانت مبهرة للجمهور لدرجة إن هاشتاج باسمها بقى تريندنج على تويتر، ولبسها أثناء المسلسل كان هو محور الحديث على السوشيال ميديا. علشان كده حبينا نجمع بعض الـ outfits بتاعت دينا وأبطال العمل التانيين، بجانب بعض من الصور الحقيقية للفنانات وعارضات الأزياء في فترة الستينيات.. ونسيبلكم انتوا الحكم بالنسبة للتشابه والاختلافات..
مش بس دينا الشربيني اللي كانت مبهرة، ولكن كمان بقية أبطال المسلسل بتسريحة شعرهم، واكسسواراتهم وطريقة كلامهم اللي من غيرهم ماكنش العمل هيطلع بالصورة اللي خلت كل الناس حابة المسلسل ومستنية بقية حلقاته.
