أعلن تركي آل الشيخ عن أول فيلم أنيميشن سعودي بتقنية 4DX كأول تعاون سعودي ياباني، فيلم الرحلة من إنتاج شركة “مانجا” السعودية واستوديو “توئي أنيميشن” في اليابان، وتنفيذه كان بين الرياض وطوكيو لمدة سنة كاملة بمجهود فريق عدى الـ300 شخص، وكان تحت إشراف إدارة شيزونو كوبون مخرج سلسلة أفلام “المحقق كونان” اللي كانت جزء من طفولتنا.
الفيلم ده تم الإعلان عنه من فترة بس اللي خلانا نرجع نتكلم عنه تاني هو إنه بقى متوفر دلوقتي على شاهد VIP باللغتين العربية واليابانية، وده بعد ما وقعت شركة مانجا للإنتاج اتفاقية مع مجموعة قنوات MBC للعرض في أكتوبر على المنصة. وده كان بعد النجاح اللي حققه وقت عرضه في السينمات والأصداء الإيجابية اللي كانت عليه.
قصة الفيلم من تيمة “الفانتازيا” وأحداثه بتدور في شبه الجزيرة العربية عن “أوس” اللي عاش طفولة صعبة بس إيمانه بالمعجزات خلى منه بطل يدافع عن مدينته وأهله، أهمية العمل ده مش بس إنه هينشر ثقافة السعودية للعالم كله ويوريهم إنهم يقدروا يوصلوا للعالمية وهما لسه بادئين في مجال الأنيمنشن، لأ ده كمان العمل كان فرصة كبيرة لكوادر بشرية سعودية ساعدها الفيلم إنها تتخصص في المجال، و بالتأكيد هيخلينا نشوف أعمال أكتر في الفترة اللي جاية، لإن الجمهور بقى يهتم بالأعمال الترفيهية وخصوصًا لو كان الكلام على كارتون! لإنها من الحاجات القليلة اللي هتلاقي جمهورها صغير وكبير.