نشرت وسائل إعلام إسرائيلية إن شركة مصر للطيران التابعة للحكومة المصرية هتبدأ تسيير رحلات مباشرة بين القاهرة وتل أبيب من بداية شهر أكتوبر 2021.
مجلة “ذي تايمز أوف تل أبيب” نشرت أخبار عن إن شركة مصر للطيران هتبدأ تسيير أربع رحلات طيران تجارية كل أسبوع بين القاهرة وتل أبيب من بداية الشهر اللي جاي.
والجدير بالذكر إن الرحلات الجوية الوحيدة اللي بين مصر وإسرائيل بتديرها شركة “سيناء للطيران” اللي بتتبع شركة “مصر للطيران”. والرحلات الجوية دي بأغراض النقل التجاري وبتكون في طائرات مش بترفع العلم المصري وده بيحصل من التمانينات. بدأت الرحلات الجوية بين مصر وإسرائيل بعد اتفاقية السلام سنة 1979 بين إسرائيل ومصر.
بنود اتفاقية السلام بين الدولتين بتنص على التطبيع التجاري وإنشاء صفقات تجارية ما بين الدولتين كجزء من معاهدة السلام اللي بينهم.
يوم الاتنين اللي فات رفعت إسرائيل قيود السفر لسيناء اللي كانت فرضتها على المواطنين الإسرائيليين بسبب جائحة فيروس الكورونا اللي فرضت قيود كتير على السفر وعبور الحدود بين دول العالم كلها.
أضافت مجلة “ذي تايمز أوف إسرائيل” نقلًا عن وزيرة النقل الإسرائيلية ميراف ميخائيلي إنها قالت: “قدرنا نلاقي طريقة نسمح بيها للمواطنين الإسرئيليين يعبروا الحدود مع المراقبة الدقيقة للوائح فيروس كورونا” وأضافت الوزيرة: “حريتنا في التنقل هي حق أساسي ويجب حمايتها”.
خلال الشهر اللي فات، قللت إسرائيل من تحذيرات السفر الأمني لسيناء لأول مرة من كام سنة، وده بعد زيارة رئيس المخابرات المصرية عباس كامل لإسرائيل والمحادثات رفيعة المستوى اللي حصلت بينه وبين المخابرات الإسرائيلية بخصوص أزمة غزة الأخيرة.
كمان التطورات الأخيرة دي جات بعد زيارة رئيس الوزراء الإسرائيلي نفتالي بينيت لمصر ولقاء الرئيس عبد الفتاح السيسي في أول رحلة يعملها رئيس وزراء إسرائيلي من سنة 2011.