الرئيس عبد الفتاح السيسي وجّه رسالة شكر وتقدير للفنان ياسر جلال بعد تبرعه بـ 3 ملايين جنيه لصندوق تحيا مصر من أيام قليلة، ودعمه للمشروعات اللي بيقوم بها الصندوق.
ونص شهادة الشكر والتقدير كان: “شهادة شكر وتقدير من السيد عبد الفتاح السيسي رئيس الجمهورية إلى السيد ياسر محمد جلال أحمد، تقديرًا منا لدوركم الوطني وإسهاماتكم الفعالة في دعم مشروعات صندوق تحيا مصر، مع أطيب التمنيات بدوام التوفيق ومزيد من الجهد لخدمة الوطن”.
الفنان ياسر جلال أعلن من أيام عن تبرعه بالمبلغ لصالح صندوق تحيا مصر، وقال: “المرة دي بعلن عن الجهة والمبلغ اللي اتبرعت به لأني بتمني إن كلنا نشترك ونعمل اللي نقدر عليه، وبدعي زملائي النجوم إنهم يتبرعوا باللي يقدروا عليه، أنا عارف إن في منهم عمل الموضوع قبل كده، بس لو عملوا ده تاني يبقي شيء عظيم”.
وكمل: “يعلم ربنا إن السبب اللي خلاني أعمل كده هو الأزمة اللي بتمر بها مصر دلوقتي، أنا راجل لا غاوي شهرة ولا نجومية، أنا بشتغل وبخلص شغلي وبروح أقعد مع مراتي وأولادي، وبعمل ده لأن كلنا شايفين إن البلد بيمر أزمة كبيرة، والعالم كله بيمر بأزمة كبيرة، وإن شاء الله الأزمة تعدي لما كلنا نقف جنب بعض”.