كل موسم في مصر ليه عاداته وطقوسه وأكلاته، والصيف مينفعش يجي من غير عربيات التين الشوكي اللي بتبتدي تلف شوارع مصر كلها من أواخر شهر يونيو لحد أوائل شهر أغسطس.
هو نوع من أنواع الصبار اللي بتتميز ثمارها بقشرة سميكة فيها أشواك، وبيتراوح لونها بين الأصفر والبنفسجي والأخضر. وثمرة التين بتتميز بإنها حلوة المذاق، وغنية بالفيتامينات والأملاح المعدنية زي فيتامين C وB والنحاس والكالسيوم والماغنسيوم اللي بيساهموا في انخفاض مستويات الكوليسترول في الدم، وانخفاض خطر الإصابة بأمراض القلب والسكتة الدماغية، وتحسين مستوى الجلوكوز فى الدم، وبينموا ويعالجوا العظام والأسنان، وبيعززوا جهاز المناعة، وبيعالجوا مشاكل الجهاز الهضمي ضمن فوائد صحية تانية كتيرة.
.jpg){kind=link}
بتنتشر زراعة التين الشوكي في سيناء، والوادي الجديد، ومناطق كتيرة من الفيوم، والإسماعيلية، والجبل الأصفر بمدينة الخانكة، وأبو زعبل في محافظة القليوبية. وهو بيتسمى بــ “فاكهة الغلابة” علشان سعره رخيص وبيتباع بالواحدة على العربيات اللي بتكون منتشرة في كل مكان.
وعلشان الشوك بتاعه مؤلم وصعب التخلص منه بعد ما بيدخل تحت الجلد، بيتباع التين الشوكي في الغالب متقشر بس مع انتشار فيروس الكورونا وزيادة خطورة الإصابة بيه، من الأفضل إننا نشتريه بقشرته وننضفه في البيت.
في أكتر من طريقة للتقشير، وواحدة من أسهل الطرق هي إنكم تغسلوا ثمرات التين كويس جداً بالمياه وتصفوها كويس علشان تتخلصوا من أكبر قدر من الأشواك، وبعد كده تمسكوا الثمرة بجوانتي، وتقطعوها من فوق ومن تحت، وبعدين تفتحوها من الجنب، وبكده هتقدروا تستخلصوا الثمرة من قشرتها. ومتنسوش تتخلصوا من القشور قبل ما تنشف ويتطاير الشوك منها.
وبالنسبة لأكل التين، فناس كتيرة أوي بتاكله زي ما هو بعد تقشيره، أو تبريده في التلاجة، واحنا ممكن نجدد في طعمه ونشربه كعصير، ونعمل منه حلويات كتيرة زي الأيس كريم بطرق سهلة وبسيطة.
لو بتحبوا اللبن تقدروا تعملوا عصير التين الشوكي باللبن، والمكونات هتكون، كُوبايتن لبن، ومعاهم ثمرتين تين شوكي، ومكعبات ثلج، ومعلقتين سكر، ومعلقة فانليا. وتخلطوا المكونات دي كلها كويس في الخلاط وتصفوهم من بقايا البذر علشان تشربوا أحلى عصير تين شوكي.
وبالنسبة للأيس كريم فهتحتاجوا 20 ثمرة تين شوكي، مع كيسين كريم شانتيه بودرة، وكوباية مياه مثلجة، وجيلاتين بودرة، ونص كوباية مياه دافئة، ونص كباية سكر.
وبعد كده هنضرب الكريم شانتيه في الخلاط مع الماء المثلج، والجيلاتين مع الماء الساخن، والتين الشوكي مع السكر، وبعد ما كل مكونين يتخلطوا ببعض كويس، نحط كل المكونات سوا ونضربهم في الخلاط، وبعد كده نحطه في الفريزر لمدة يوم وهيكون جاهز بعدها للأكل وتبريد حر الصيف.