الشغل من البيت بدأ يظهر بالتدريج وبشكل كبير من وقت كورونا، وبقى سياسة وشيء طبيعي بتستخدمها الشركات، لازم تشتغل على الأقل في السنة كام يوم من البيت.. وفي اليوم العالمي للعمل من المنزل، جبنالكم خلاصة الموضوع وحبينا نبقى صريحيين معاكم ونقولكم على الجانب الحلو والوحش للموضوع، والكورة في ملعبك وأنت عليك تختار.
الجانب الحلو
هتلبس بيجامتك براحتك
مش هتحتاج كل يوم تصحى الصبح وتفضل محتار نص ساعة قدام الدولاب على اللبس اللي هتلبسه، لأ أنت هتلبس اللي أنت عايزه، ولو حصل اجتماع طاريء على زووم، إما تقفل الكاميرا أو تطقم من فوق بالبدلة وتحتها بنطلون البيجامة عادي. لبس البيت بيدي لك حرية إنك تقعد من غير قيود.
هتوفر وقتك وتترحم من فرهدة المواصلات
الشغل أحيانًا ممكن يبقى على بعد ساعة وساعتين من بيتك، يعني ساعتين رايح وساعتين جاي ده غير ساعات الشغل نفسها، يعني كإنك مقضي حياتك وواهبها للشغل وطريق الشغل، بس لو قعدت في البيت هتوفر وقت كبير بيضيع في طريق الشغل وهتوفر نص مرتبك اللي بتكعه بسبب المواصلات.
مش لازم البيت بس
إنك تشتغل remotely مش معناه إنك هتفضل قاعد على سريرك طول الوقت، لأ ده أنت ممكن تتنطط في كل حتة؛ تشتغل على البحر أو في كافيه، وتشوف مناظر طبيعية أحسن من الحيطة اللي بتشوفها قدامك وأنت قاعد على مكتبك في الشغل.
هنحافظ على زهرة شبابنا اللي بتروح على قعدة الكرسي
الساعات الطويلة اللي بنقضيها في الشغل واحنا قاعدين على نفس الكرسي مش بنتحرك بتجيب لنا ديسك وآلام في العضلات والفقرات وكل أمراض الشيخوخة.
الجانب الوحش
هتحس إنك معزول عن العالم
حياتك والشغل والبيت هيبقوا حاجة واحدة بالنسبة لك، مش هتعرف تفصل بين قعدة الشغل وقعدة البيت، ده غير إنك هتلاقي أهلك في البيت قاعدين مبسوطين وبيضحكوا وأنت قاعد محبوس في الأوضة جوا ومتكدر علشان تخلص الشغل اللي وراك، وبالتدريج هتبدأ تحس بالملل من قعدة البيت كل يوم.
هتدفع فلوس الإنترنت من جيبك
خصوصًا لو القرار إنك تقعد في البيت من دماغك، فأنت مسؤول إنك تدفع اشتراك الإنترنت بتاع كل شهر، ودي أكيد حاجة هتعور المرتب بالذات لو طبيعة شغلك بتحتاج باقة نت معينة.
التواصل مع الناس في الشغل بيبقى أصعب
التواصل لما بتكون في المكتب بيبقى أسهل وكل التيم بيبقى حواليك وتقدر تسألهم أي سؤال بسهولة، لكن في البيت هتضطر تدفع فواتير موبايلات قد كده وأنت بتكلمهم لإن أحيانًا كمان الواتساب وغيره مش بيسعفك وينجز معاك.
المرتب هيتعور وهتشحت أخر الشهر
في الغالب في شركات بيبقى عندها سيستم لو هتشتغل في البيت فهيتخسف بمرتبك الأرض، حوالي نص المرتب هيطير، فلو عندك استعداد لده أشتغل من البيت.