قناة دبي الفضائية في الأيام اللي فاتت استضافت حاخام يهودي في واحد من برامجها المتخصصة في الطبخ “نكهة إكسبو”، علشان يتكلم على حد تعبيرها في الحلقة عن “المطبخ الإسرائيلي”! وده اللي أثار غضب ناس كتير على مواقع التواصل الاجتماعي و اعتبروا إن القناة كده بتروج لسرقة الإسرائيليين للطبخ العربي والفلسطيني من خلال شاشتها.
اللقاء والحوار في الحلقة كان عن مميزات اللي سموه بالـ”المطبخ الإسرائيلي”، وعرضوا مجموعة من الأطباق العربية المعروفة ونسبوها لهم! زيّ الحمص والشاورما والشكشوكة والطعمية! والحاخام كان بيتكلم عن التشابه الكبير بين الأطباق العربية وأطباق المحتل لإنه بيعتبر إن إسرائيل جزء من الشرق الأوسط! واللي زاد الموضوع إن في شريط البرنامج وصفوا الفلسطينيين بعبارة “السكان الأصليين” بدل من كلمة فلسطينيين!
كتب الناشط الإماراتي عبد الله الطويل “لتعريف المواطن بالمطبخ الإسرائيلي: استضافوا حاخام علشان يتكلم عن المطبخ الإسرائيلي بعد انتشار واسع لمطاعم إسرائيلية في دبي ملاكها من الصهاينة”!
وده لإن الإمارات العربية كانت أعلنت عن تطبيع رسمي لعلاقتها مع “إسرائيل” في أغسطس 2020، مع كشفها عن استعدادها لتوقيع اتفاقيات تعاون في مجالات تانية.
دايمًا في محاولات لهم علشان يعملوا غزو ثقافي وفكري وفي كل وقت وكل مناسبة. ومن سنتين وفي اليوم العالمي للتغذية كانوا بيروجوا لنفس الفكرة وبيستولوا على أطباق وأكلات هي معروفة من قديم الأزل بتاعة مين!
وده وقت ما نشر المتحدث باسم الجيش الإسرائيلي بوست في يوم التغذية العالمي بيقول فيه إن دي مجموعة من الأكلات المعروفة في المطبخ الإسرائيلي ومعتقد إنه لما يحط كلمة إسرائيلية جانب الوصفة تبقى كده بتاعتهم!
وقبلها شاركت إسرائيل في المهرجان السنوي للمفتول في مدينة سان فيتو لوكار الإيطالية عام 2000، وفازت بالجائزة الأولى لأحسن طبق!
وبينشروا مقاطع فيديو على الإنترنت وبيظهروا فيها الدبكة على إنها رقصة فلكلورية في إسرائيل! وبيستخدموا كلمات عبرية مع ألحان أغاني الدبكة الفلسطينية.
أعطى من لا يملك لمن لا يستحق
لما تنسب تاريخ غيرك وتراثهم وعاداتهم وتقاليدهم وأكلهم وشربهم ولبسهم ليك. ده أكبر دليل إنك ماعندكش هوية تتطلع تتكلم عنها. هويتك بتغتصبها تمامًا زيّ ما اغتصبت الأرض. الهوية للي عنده أصل وجذور والمحتل عمره ما كان له أصل أو جذور. المحتل مشتت في كل بقاع الأرض بيحاول دايمًا يزور في حقائق معروفة وواضحة وضوح الشمس!