طلب زيادة المرتب من أصعب الحاجات اللي ممكن أي موظف يطلبها طول مدة شغله في المكان، خصوصًا عند الناس اللي عندها رهاب اجتماعي وبتتوتر بطبعها وهي بتتكلم مع حد فتخيل لو الشخص ده كان رئيسك في الشغل، وممكن الناس دي تفضل سنين من غير ما تطلب حقها لمجرد إنهم ماعندهمش جرأة الإقدام على خطوة زيّ دي.
وللسبب ده جبنا لكم شوية نصايح بسيطة تساعدكم وأنتم داخلين تطلبوا زيادة في المرتب.
خليك وثيق من الفوز
أهم حاجة يبقى عندك ثقة في نفسك لإنك بتطلب حقك، عدم الثقة بالنفس هيضعف موقفك، ولما يتوجه لك أسئلة مش هتعرف تدافع أو تثبت إنك تستحق ده، فماتتوترش وأنت داخل على مديرك، والأحسن لو قدمت طلب قبلها بيوم علشان المدير يبقى مهيأ نفسه، وتخف من عليك الضغط شوية لإنك هتخش في الموضوع على طول.
الوقت يا عزيزي
اختار الوقت المناسب علشان تطلب، ماتجيش في وقت تكون الشركة واقعة فيه مثلًا، أو مافيش أرباح بتدخل لها، أو مافيش عملاء بييجوا لها، وتقوم أنت داخل تطلب زيادة برقم خيالي، اتعلم تختار الوقت الصح، ونقطة مهمة بخصوص الوقت، إن ساعات ناس لسه جاية المكان وتطلب زيادة طب أنت هتطلب زيادة بناءً على إيه؟ ماعندكش سبب أو مبرر أو حجة قوية تطلب بها، وفي الغالب طلبك هيترفض، الأحسن إنك يبقى عندك أساس قوي وحجة تبني عليها.
احذر الأسئلة الثعبانية
خليك مستعد لكل الأسئلة اللي هتتسأل لك، اعرف قيمة نفسك وليه أنت تستحق الزيادة، علشان لما يتوجه لك أي سؤال تبقى عارف هترد تقول إيه بناءً على إنجازاتك في المكان والحاجات اللي أنت حققتها، وجهز ليستة بالحاجات اللي حققتها للمكان خلال مدة شغلك فيه.
اتعلم فن التفاوض
فن التفاوض بيقول لما تطلب رقم معين، حاول تزود عن اللي الرقم الحقيقي اللي أنت عايزه، علشان لما المدير يحب يفاصل معك ويقلل من الرقم اللي اتطلب، تبقى أنت برضه في الأمان.
بربع جنيه بحث
دور واسأل واعرف قيمتك في السوق، شوف اللي في نفس وظيفتك أو نفس خبرتك بياخد كام أو إيه متوسط المرتبات في المجال، ولو لقيت إنك بتاخد أقل من حقك، لازم تطلب، ولو بتقعد ساعات زيادة برا شغلك لازم تقول، ولو بيتم تكليفك بشغل خارج حدود الوظيفة يبقى لازم تقول، كل الحاجات دي هتعزز فرصة قبول الزيادة.
اوعى تستسلم
ماتستسلمش أو تخرج من المقابلة خسران، لو رفض الزيادة حاول تطلع بأقل الخساير، زيّ إنك ممكن تأجل لحد ما وضع الشركة يتحسن أو إنك تهدد ضمنيًا، ومش صراحةً، إنهم ممكن يخسروك لو مأخدتش الزيادة، بس النقطة دي بتتوقف على حاجات كتير، أولها وضعك في الشركة أو المكان عامل ازاي، وهل هما فعلًا ممكن يخسروا لو مشيت ولا لأ.
آخر حاجة: ماتحاولش تقلد اللي عمله عبد الفتاح القصري في الفيديو ولا اللي قاله عادل إمام، وماتحاولش تدخل كإنك داخل تشحت وتقول أصل الظروف ومش معايا أدفع الإيجار، لإن المدير مش أخصائي اجتماعي ولا هو جاي يحقق لك أحلامك، حاول إنك تبقى عملي وتقول ببساطة “أنا استحق ده”.