متحف النوبة بيعتبر من أهم المعالم السياحية والأثرية في أسوان، وتم افتتاحه في سنة 1997، وظهرت فكرة إنشاء المتحف أثناء الحملة الدولية لإنقاذ آثار النوبة وتبنتها منظمة اليونسكو، وأعدت الدراسات لبناء المتحف في أوائل الثمانينيات، وبيحتوي على أكتر من 5000 قطعة أثرية بتبين مراحل تطور الحضارة النوبية وتراثها.. وبيتميز تصميمه المعماري باللمسات النوبية اللي مستوحاة من المقابر الفرعونية، ومساحته 50 ألف متر مربع، سبع آلاف متر مربع منهم لمبنى المتحف، والـ 43 ألف متر مربع التانيين للموقع الخارجي والعرض المكشوف.
اقرأ أيضًا: أعرفوا ليه النوبيين بيطبخوا كرامن أرجيه يوم خسوف القمر.
متحف النوبة من أهم المتاحف المصرية، فهو بيخلد تاريخ وفنون النوبة من المنحوتات، والتماثيل، والنقوش، والمومياوات، واللوحات التذكارية، فمثلًا هنلاقي هناك هيكل عظمي لإنسان عمره 200 ألف سنة، وتم اكتشافه سنة 1982 في منطقة إدكوباتيه بأسوان.
متحف النوبة مش بيعّرف تاريخ المنطقة بس، ولكن كمان بيزوره ناس كتير من كل مكان في العالم بهدف العلم، فهو بيدعم الأبحاث المختلفة اللي بيعملها الباحثين والعلماء في منطقة النوبة وده بيتعمل في مركز الدراسات ومراكز التوثيق الموجودة بالمتحف.
والمتحف من جوه مكون من 3 أدوار، البدروم وده فيه قاعة العرض الرئيسية، ومعامل الترميم، والورش، ومخازن الآثار، ومركز استقبال، والمسرح المكشوف، والتاني هو الدور الأرضي وفيه المدخل الرئيسي، وقاعة عرض، وقاعة المحاضرات، وقاعة لكبار الزوار، وغرف الأمن والإدارة، وغرفة مدير عام المتاحف، أما الدور الأول فده فيه الكافيتريا، والمكتبة، والمتحف، وحجرات تصوير فوتوجرافي، وميكروفيلم، وإدارة المتحف، والخدمات.