اتحاد الكرة المصري بيحدد يوم 15 يوليو لرجوع الدوري الممتاز
يوم الإتنين اللي فات اللجنة الخماسية المسئولة عن إدارة اتحاد الكرة بعتت تصورها لعودة الدوري الممتاز لوزارة الشباب والرياضة بعد ما الدوري كان إتأجل لمدة 15 يوم كجزء من الإجرائات الاحترازية اللي الحكومة طبقتها في محاولة لإحتواء فيروس كورونا المستجد اللي وصل عدد الإصابات بيه لـ 5200 حالة.
في حالة الموافقة على التصور ده، الدوري الممتاز هيرجع للملاعب يوم 15 يوليو وهيتم استكمال اللي اتبقى من الماتشات، بس عمرو الجنايني رئيس اللجنة الخماسية وضَح إن هيتم تطبيق الإجرائات الاحترازية خلال اللقاءات عشان تقل فرص انتشار الفيروس.
والتصريح ده جه بعد ما اللجنة الخماسية رفضت اقتراحات بإلغاء بطولة كأس مصر بسبب أزمة “كوفيد-19″، وإن الدوري هيتم استكماله في أي وقت حتى لو الوضع استمر لحد سبتمبر الجاي.
في الوقت الحالي، النادي الأهلي متصدر قوائم الدوري المصري الممتاز بـ 49 نقطة، ويليه نادي المقاولون العرب بـ 33 نقطة، وبعديه في المركز التالت نادي بيراميدز بـ 32 نقطة، عشان يجي الزمالك في المركز الرابع بـ 31 نقطة.