أخواتنا الفلسطينيين في حرب حقيقية ولسه الاحتجاجات على قرارات طردهم من بيوتهم في الشيخ جراح مستمرة، ولسه مستمر معاه العنف والقصف اللي حصل على غزة واقتحام المسجد الأقصى أثناء الصلاة في أيام العشر الآواخر من رمضان، واللي راح ضحيته مئات من الفلسطينيين من بينهم أطفال. وفي ظل حالة الغضب والحزن على الوقت العصيب اللي بيمر بيه كل فلسطيني بيدافع عن حقه في الاحتفاظ بأبسط حقوقه، مش بس الفنانين المصريين والعرب اللي فكروا إزاي يساعدوا ويظهروا دعمهم للقضية الفلسطينية، ولكن كمان فنانين من مختلف أنحاء العالم اتجمعوا تحت مظلة الرحمة، علشان يدافعوا عن الشعب اللي مُجرد من أبسط حقوقه الإنسانية.
رامي صبري
نشر الفنان رامي صبري مقطع من أغنية جديدة اتعملت مخصوص لدعم الفلسطينيين في أزمتهم. الأغنية باسم “القضية مكملة” من كلمات تامر حسين وألحان رامي صبري، في أغنية عبرت بكلماتها عن كل اللي كلنا نفسنا نقوله ونوصله..
عمرو مصطفى
عمرو مصطفى كان من الفنانين اللي قرر يستخدم فنه في توصيل رسالة واضحة للعالم كله وإبراز موقفنا كعرب تجاه القضية الفلسطينية وتمسكنا بدعم الفلسطينيين مهما طالت السنين. من المنتظر إننا نسمع أغنية بتدعم فلسطين “بكل اللهجات” قريبًا.
محمد هنيدي
الفنان محمد هنيدي كان من أوائل الفنانين اللي يظهروا دعمهم لفلسطين وتصدر الترندات لما اتكلم عن أزمة الفلسطينيين اللي مجردين من أبسط حقوقهم إنهم يحتفظوا ببيوتهم من الطفولة ويعيشوا فيها بسلام وأمان.
فيولا ديفيس
الممثلة والمنتجة الأمريكية فيولا ديفييس نشرت على حسابها بانستجرام منشور بيوضح بشاعة اللي بيحصل للشعب الفلسطيني على إيد الجيش الإسرائيلي، علشان تعرف العالم كله حقيقية جيش الاحتلال.
روجر ووترز
الفنان البريطاني نشر فيديو على حسابه الخاص وهو بيتكلم عن عملية الإبادة وإخراج السكان الفلسطينيين من أماكن إقامتهم بالإجبار بدون وجه حق، وقال على إسرائيل إنها دولة عنصرية بكل ما تحمله الكلمة من معنى.
لاعبي نادي بالستينو
في لافتة جميلة وإنسانية، خلال مبارة كرة القدم، أظهر لاعبي نادي بالستينو الأسباني تضامنهم مع الفلسطينيين، بارتدائهم كوفيات اللي معروف بلبسها الفلسطينيين.
بيلا حديد
الفنانة الأمريكية والفلسطينية بيلا حديد بتنشر باستمرار على خاصية الستوري تطورات اللي بيحصل في فلسطين وبتظهر دعمها المستمر وفخرها لانتمائها لدولة فلسطين ودفاعها عن شعبها.