في فنانين كتير لما بيفارقوا الحياة، بنحس إننا فعلًا خسرنا قيمة وقامة كبيرة مش هتتعوض، خصوصًا لما يكونوا من زمن الفن الجميل. وبعض الأجيال اللي حتى ماحضرتهمش في حياتهم، بيتمنوا لو كانوا موجودين في زمنهم علشان يقدروا يستمتعوا بغنائهم وفنهم العظيم.. لو كان بس في أى طريقة لإحيائهم من جديد ونشوفهم في حفل غنائي! بس الحقيقة إن تقنية الهولوجرام الجديدة ساعدت شوية في تحقيق الحلم ده. ومن الرموز المصرية اللي مش هتتكرر هو النجم العظيم والراحل عبد الحليم حافظ، اللي ممكن يكون من أكتر الفنانين اللي في إجماع على صوته وموهبته.
ولكل جمهور الفنان الراحل عبد الحليم اللي اتمنوا في بوم إنهم يحضروا له حفلة ويستمتعوا بصوته فيها، دلوقتي تقدر تحصل على التجربة دي! من المقرر إحياء حفلة للفنان عبدالحليم حافظ بتقنية الهولوجرام على مسرح مول العرب في القاهرة يوم 17 و18 من شهر يونيو الجاري، بعد ما تم بالفعل إحياء حفل بالهولوجرام للعندليب في دبي من فترة، طبعًا مع كل الالتزام بالإجرائات الاحترازية اللازمة.
من المقرر إن يكون مدة الحفل 90 دقيقة هتجمع أهم أغاني العندليب المختلفة وهيتم عرض لقطات حقيقية من حفلات قديمة قدمها وأحياها عبدالحليم. وبالفعل تم أخد موافقة ورثة وأهل الفنان الراحل لإقامة الحفلة، اللي قالوا إن مفيش مانع في حالة تقديم حفل راقي يليق بتاريخ وفن العندليب، وإن من حق جمهوره اللي لم يعاصره أو أخد الفرصة إنه يحضر حفلاته، إنهم دلوقتي يحصلوا على تجربة شبيهة بحضورهم لحفل الهولوجرام ويعيشوا يوم من أيام زمن الفن الجميل.
آخر كلمة: ماتفوتوش حضور الحفل، وماتفوتوش قراءة “في ذكرى وفاة عبد الحليم حافظ، تعالوا نسترجع أهم المحطات في حياته“…