الأطفال والقراءة، عادة مهمة جدًا لبناء عقل الطفل وتوسيع أفاقه، بس مع تقدم التكنولوجيا وإقبال الأطفال على الألعاب الإلكترونية والبدائل الرقمية بقى صعب جدًا إن الأهالي يحافظوا عليها. وعلشان نشجع الأطفال على القراءة لازم يكون بإسلوب يناسبهم، وعن طريق ألعاب ومسابقات بتجذب انتباههم وتشجعهم على استكشاف عالم الكتب والحواديت.
الألعاب بتحمس الأطفال إنهم يكملوا للنهاية، وكمان لما يكون عندهم دافع الفوز بيتعلموا بشكل أسرع، وده اللي دفع دار نهضة مصر للنشر والتوزيع إنها تعمل مسابقة “إحكيها بطريقتك” علشان تشجع الأطفال على القراءة عن طريق تلخيص الكتب وتسجيل فيديوهات لنفسهم بيقولوا فيها اللي فهموه بأسلوبهم، والمسابقة بدأت من يوم 5 يوليو وهتستمر لحد نص أغسطس الجاي.
المسابقة بتهدف لتشجيع الأطفال على بناء مكتبة خاصة بيهم لفصل الصيف، وهي بتشمل 5 كتب بيقوم الأطفال باختيارها من مجموعات الكتب اللي بتقدمها الدار. وبعد ما يقرأ الطفل الكتب اللي اختارها، مطلوب منه إنه يسجل فيديو، لمدة ثلاث دقائق بحد أقصى، يقدم من خلاله شرح ملخص لكتاب من الكتب دي، ويشارك الفيديو على صفحات السوشيال ميديا الخاصة بالدار علشان يحصل على فرصة الفوز بواحدة من ثلاث جوائز مالية.
باب المشاركة في المسابقة مفتوح قدام الأطفال من سن 9 لـ 12 سنة، والمراهقين من سن 12 لـ 15 سنة، وهيكون في ثلاث فائزين من كل مرحلة عمرية بالجوائز اللي بتتراوح قيمتها بين الخمس ألاف والثلاث ألاف جنيه مصري.
دار النشر محددة مجموعة من باقات الكتب المناسبة للمراحل العمرية اللي هتشارك في المسابقة، والميعاد النهائي لاستلام فيديوهات الأطفال هو يوم 31 يوليو، وهيتم رفعها يوم 1 أغسطس على صفحات الدار على السوشيال ميديا لحد نص أغسطس. والفيديوهات اللي بتبين فهم الأطفال واستيعابهم لمحتوى الكتب اللي قرأوها، وهتاخد تفاعل عالي من الجمهور هي اللي هتكسب.