خلق لنفسه طريق مختلف في التقديم التلفزيوني، وعمل برامج بأسلوبه المميز اللي كان سبب في شهرته، بجرأة وأسئلة مختلفة، كان بيطلع جانب آخر من المشاهير ماكناش شوفناه قبل حواراته، الإعلامي المشهور مفيد فوزي اتوفى النهارده عن عمر يناهز 89 بعد صراع مع المرض، وساب تاريخ طويل وكبير من التقديم التلفزيوني والحوارات مع مشاهير.
المحاور
أسلوبه كان سبب تفرده وشهرته، في وقت كان كل الحوارات واللقاءات التلفزيونية واخدة تقريبًا نفس الشكل، طلع مفيد فوزي بأسلوبه في الحوار اللي كان بيدخل به جوا شخصيات المشاهير وبيعرض جوانب تانية من شخصياتهم، وده لإنه كان بيعتمد على مبدأ “تلفزة الصحافة” أو “تصحيف التلفزيون” ومشي على الأسلوب ده وقدم عدد من برامج الصحافة على شاشة التلفزيون، ده غير التحقيقات المتنوعة والحوارات مع أهم الشخصيات السياسية والأدبية والفنية، وعلشان كده لقبوه بـ “المحاور”.
حديث المدينة
أشهر برنامج قدمه مفيد فوزي على مدار سنين، ويمكن لحد دلوقتي الموسيقى المشهورة للبرنامج ترن في ودنك أول ما تقرأ اسمه، البرنامج ده كان من أول البرامج التلفزيونية اللي تخرج بكاميراتها للشارع وعلى أرض الواقع، ورغم إن كتير قالوا عليه إن أسلوبه جريء، لكن ده سلاح ذو حدين وكان بيستخدمه مفيد في إنه يطلع بحوارات تفضل في تاريخه، مش مجرد لقاءات وحوارات تتعرض وقتها وتموت بعد وقت.
الربنامج انطلقت أول حلقاته في 1994، وتوقف في 2013، وبعد توقف البرنامج كتب مفيد فوزي في مقال له: “الشارع المصري عرفني من خلال سؤال “اسمح لي أسألك”” وأشار لإنه في البرنامج ده حاور تحت أضوائه كبار السياسيين والمفكرين، الشرفاء والمجرمين، وكشف عن الوجه الآخر للفنانين والأدباء.
أهم حوارات في حياته
معروف عن مفيد فوزي إنه عمل حوارات مع شخصيات مهمة، لكن مين هما؟
مفيد فوزي حاور الرئيس الأسبق مبارك 4 مرات، وحاور عدد من رؤساء الوزارات في مصر، ومن أهمهم عاطف عبيد، وكمال حسن علي، وعلي لطفي، وكمال الجنزوري، وأحمد نظيف.
ومن الفنانين، عمل حوارات مميزة مع وردة ومحمد عبد الوهاب وسناء جميل وعمرو دياب وأمينة رزق ونجلاء فتحي وفؤاد المهندس وعمرو دياب، ده غير يوسف السباعي، ويوسف إدريس، وإحسان عبد القدوس، ونجيب محفوظ، ومصطفى أمين، وغيرهم كتير.