لحظة أول بث للتلفزيون المصري كل الأسر اللي عندها تلفزيون كانت مستنياها ومتحمسة، خلاص الناس بعد كده هتشوف الأفلام بدل ما تروح للسينما وتدفع تمن التذكرة، وخلاص هيعرفوا كل حاجة بتحصل حواليهم بدل ما كانوا بيقعدوا جنب الراديو بالساعات مستنيين بيان أو خبر.
بث القناة الأولى في البداية كان 5 ساعات بس. يوم الخميس الناس كلها بتبقى قاعدة مستنية فيلم “السهرة”، ومسلسل “الساعة سبعة”. وبرنامج نادي السينما اللي كان بيعرض كل سبت الأفلام الأجنبية، وبعد ما البرامج كانت بتتعرض كان التلفزيون بيشطّب ولازم كله يدخل ينام وهما متحمسين هيشوفوا إيه تاني يوم. وفي ذكرى انطلاق أول بث للتلفزيون المصري، هنتكلم عن ذكرياتنا مع برامجه.
صباح الخير يا مصر
موسيقى لسه في ودان الناس اللي سمعتها في الطفولة وهما رايحين المدرسة الساعة سبعة بالظبط، كان بيتكلم عن الحياة اليومية في كل الجوانب للمواطن المصري، وكان قريب من الناس والشارع. البرنامج لسه عايش معانا على مدار السنين اللي فاتت، ولسه اسمه وجهة على التلفزيون المصري باختلاف الطاقم اللي بيتغير كل سنة.
كلام من ذهب
كان الصندوق السحري لناس كتير، وماحدش في مصر ماكنش يعرف طارق علام، أي حد كان لازم يوقفه في الشارع ويتصور معاه، برنامجه كان برنامج شارع لكل الناس؛ كان بيلف في كل حتة ويسأل الناس أسئلة مقابل جنية دهب، كان كله مشاعر إنسانية لما تشوف فرحة الناس وهي بتكسب الجنيه من غير تخطيط أو أي حاجة كله بالصدفة البحتة.
جولة الكاميرا
من أقدم برامج المنوعات اللي كانت بتتعرض على التلفزيون المصري من تقديم الإعلامية الراحلة، هند أبو السعود، البرنامج كان بيعرض نماذج كتير إيجابية اتحدت الصعوبات وبيتكلم عن الطبيعة والعالم. كنت بتسافر معاها كل حتة في العالم وأنت قاعد مكانك، ناس كتير عرفت سلفادور دالي وازاي بيتم اطلاق القمر الصناعي والصواريخ في اليابان وبلاد الإسكيمو وحيوانات القطب الشمالي من خلال البرنامج ده. وقتها ماكانش وسائل الاتصال متوفرة فدي كانت حاجات نادرة، شرحها كان فيه الخلاصة ومبسط بجانب المتعة البصرية اللي كانت بتعرضها.
عالم الحيوان
كل يوم جمعة من كل أسبوع كان معاد الأطفال والكبار مع برنامج عالم الحيوان بصوت محمود سلطان، واللي بيعتبر علامة من علامات التلفزيون المصري؛ كان صوت مميز كنت تسمع منه معلومات ثرية ودسمة عن حياة الحيوانات وأسرارهم اللي ماكنش حد يعرف عنها حاجة، حاجة كده شبه ناشونال جيوجرافيك بس على قديمه.
الكاميرا الخفية
فؤاد المهندس هو أول حد بدأ فكرة برامج المقالب على شاشة التلفزيون المصري وقدمها للمرة الأولى سنة 1983، وكان أول برنامج كاميرا خفية في مصر والعالم العربي. فؤاد المهندس كان هو اللي بيقدم الحلقة وبيحكي عن مضمونها، والمواطن المصري هو نجم الحلقة؛ بيقيسوا رد فعله من خلال مواقف كوميدية بيتحط فيها بيعملها فيهم إسماعيل يسري.
بدون مونتاج
كانت بيتعرض في شهر رمضان لمدة تسع سنين، الإعلامية، دينا رامز، كانت بتقدم من خلاله مشاهد بيشوفها الجمهور لأول مرة عن كواليس أعمالهم الفنية، زيّ مسلسل “ونيس” ومسلسل “وأنت عامل إيه” و”الرقص على السلالم المتحركة”. الجمهور كانوا بيشوف من خلالها النجوم ورا الكاميرا على طبيعتهم وبمنتهى التلقائية.