أوقات كتير بنعامل جوجل كإنه فرد من العيلة، ورايحين جايين نسأله على كل حاجة، مهما كانت غريبة، لدرجة إن نفسنا يفهم لحن أغنية بندندنه ويقول لنا هو اسم الأغنية، المعاملة دي ولا كإنها لساحر هيعرف كل حاجة في الدنيا، وده كمان وصل لإن جوجل مش هيرد بعد كده على الأسئلة الغبية، وده حقه الصراحة، علشان كده فكرنا نعمل قائمة بأغرب حاجات بندوّر عليها على جوجل.
تفسير الأحلام
لو أنت مؤمن بالأحلام وتفسيرها وأثرها على حياتك في الواقع، ومش عامل زينا وبتحلم إن في طبق مكرونة بيجري وراك، فتروح تسأل جوجل عن تفسير حلم ليك، هتستنى منه إيه؟ اللي بيطلع هو تفسيرات غريبة للعازب والمتزوج وحاجات غريبة، لو حصلك معرفش إيه يبقى هتجيب هدوم جديدة، وحاجات كده.
أعراض مرض أو علاجه
هل الدنيا خلصت من الدكاترة؟ هل كلية الطب بطلت تخرّج دكاترة؟ الدنيا ضاقت ورايح تسأل جوجل عن أعراض حاسس بيها، وفي الأخر بيقولك تحضر كفنك.
ازيك يا جوجل
يعني إيه مستوى الفراغ اللي وصل بيك إنك تدخل جوجل تسأله ازيك؟ طب مستني يقولك إيه؟ هل خلصت كل الناس اللي في حياتك وقرايبك وصحابك وجيرانك وأصحاب زمان سألت عليهم كلهم وخلاص مفاضلش غير جوجل تطمن عليه وعلى أحواله؟
البطاريق ليها ركبة؟
أكيد قبل ما تنام عقلك بيفضل يفكر في حاجات غريبة، ويسأل أسئلة مش منطقية كده عارفها؟ احنا متأكدين إن اللي دوروا على إجابة للسؤال ده جالهم السؤال قبل ما يناموا، أصل مفيش أي ظرف في الدنيا يخليك تفكر وتتسائل البطريق عنده ركبة ولا لأ إلا إذا كنت داخل تنام وبتفكر في أي كلام.
هل الأرض مسطحة؟
عارفين احنا في سنة كام دلوقتي؟ ولسة في ناس بتسأل وتجادل الأرض كروية ولا مسطحة، وبيجادلوا بقلب جامد على السوشيال ميديا، بس من الناحية التانية بيروحوا يسألوا جوجل السؤال العظيم ده.
لماذا نحن هنا؟
يعني هو إن شاء الله يكون بيدوّر على الأغنية، مش إنه دماغه جابته يدخل يسأل جوجل لماذا نحن هنا من الأول بقى، وأسئلة وجودية كبيرة، وهو بيسألها لجوجل ومستني إجابة.
ليه مديري بيكرهني؟
مشاكل بينك وبين مديرك، جوجل هيعرفها ويحلها؟ هو واحد من العيلة أه بس المشاكل من النوع ده الست الوالدة تقترح عليك حلول بقى، أو الإتش آر، مش جوجل خالص.
هل أنا حامل؟
الحالة الوحيدة اللي هنعديلك فيها فكرة إنك تسأل جوجل السؤال ده، هو الموقف اللي في الصورة دي، فممكن من عنصر المفاجأة دماغك تتشل وتروح تسأل جوجل تستنى منه إجابة، غير كده مفيش أي مبرر.
ازاي أنجح من غير ما أذاكر
لو جوجل عارف ماكانش زمانه بقى جوجل، يعني لو كان في طريقة تفتكر كنا هنفضل هنا دلوقتي؟ سيب جوجل وأمسكلك كتاب ينفعك.
كرهت مراتي
احنا مقدرين إن الإنسان ممكن يبقى محتاج في حياته شخص مجهول يرمي عنده أسراره كده ويفضفض له من غير ما يقلق، بس برضه مش لدرجة إنك تفضفض لجوجل وتقول مشاكلك أنت ومراتك وتقوله إنك كرهتها، مستني يقولك طلّقها؟