أزمة جديدة بين عمر كمال ونقابة المهن الموسيقية، إيه اللي حصل؟

في أزمة جديدة من أزمات نقابة المهن الموسيقية صدر في الساعات اللي فاتت قرار بإحالة عمر كمال للتحقيق بعد واقعة تغيير كلمات أغنيته من “خمور وحشيش” لـ”تمور وحليب” في واحدة من حفلات الدول العربية ولما أتسأل عن سبب تغيير كلام الأغاني في الوقت ده بالذات بالرغم إن هاني شاكر كان سبق وطلب منه إنه يغير الكلام بتاع الأغنية، رد عمر كمال وقال إن أنا واقف على أرض طاهرة. طب وإيه اللي حصل بعد كده؟

رد فعل هاني شاكر والنقابة كان إيه؟

والموضوع ده استفز نقابة المهن الموسيقية وخصوصًا الفنان هاني شاكر وقال في البيان إن “كل القوى المدنية والشعبية ونقابة المهن بيواجهوا كل اللي بيحاول النيل من قداسة الوطن والعبث في مقومات وجود الفضيلة والأخلاق كل في موقعه والتصدي ، لكل ما هو مسف ورديء على الساحة الفنية وخطورته على مستقبل أجيال قادمة، وبناء على هذا تم تحويل المطرب عمر كمال للتحقيق فيما صرح به من كلمات تسيء لسمعة مصر وصدور القرار المناسب فور الانتهاء من التحقيق.”

رد عمر كمال على خبر تحويله للتحقيق

وبعدها نزل عمر كمال فيديو وبيقول إنه اتفاجأ بقرار تحويله للتحقيق بتهمة إساءة سمعة مصر، وأكتر من إتهام هو مش عارف سببهم إيه بالظبط، وقال إنه لما قال كلمة “تمور وحليب” بدل كلمة “خمور وحشيش” كان قصده إنه يهزر مع الجمهور السعودي لإنهم مشهورين بالحاجتين دول وإنها تليق على الأرض المقدسة، فالناس أخدتها كإسقاط بإن مصر مش أرض مقدسة وحرفوا في الكلام، وإنه ماكانش ده قصده خالص، وإن أنا مش مسئول عن أي صفحة حرفت في أي حاجة علشان تعلي نسب المشاهدة.

وكمل عمر كامل وقال إن نفس الموضوع ده حصل مع العندليب عبد الحليم حافظ وقت لما غنى أغنية “قولوله الحقيقة” واستبدل كلامها بـ”روحولوه المدينة” هل ده معناه إنه أساء لمصر لما غنى كلام حب ولما راح المدينة استبدلها بموشحات؟

واختتم الفيديو وقال مصر على رأسي من فوق وأنا عمري ما عملت ولا هعمل أي حاجة تسيء لها، والموضوع كله كان سوء تفاهم.

أخر كلمة: ماتفوتوش قراءة: منع حسن شاكوش نهائيًا من الغناء: قرار نقابة المهن الموسيقية وردود الأفعال