أحمد بسام زكي هو طالب بالجامعة الأمريكية بالقاهرة متهم باغتصاب عشرات البنات والتحرش بعشرات تانيين، غير تهم تعاطي المخدرات. بدأت قضية أحمد بسام زكي كقضية رأي عام تشغل الساحة المصرية من حوالي سنة لما بنات كتير بدأوا يتكلموا على السوشيال ميديا ويحكوا حكايات مرعبة عن المغتصب المتسلسل اللي بيغري البنات بالخديعة لبيته وبيغتصبهم وبيدمر حياتهم.
تم القبض على زكي وإحالته للنيابة وبدأت محاكمته وهو محبوس في 17 تهمة منها هتك العرض والتحرش والابتزاز والتهديد وانتهاك حرمة الحياة الخاصة وتهم تانية.
ولإن قضية زكي لسه موضع اهتمام الشارع المصري ولسه الناس متابعة حيثيات المحاكمة بتاعته، انتشرت إشاعات كتير على السوشيال ميديا خلال اليومين اللي فاتوا عن محاكمته، ومعظم الإشاعات كانت بتقول إن زكي أخد براءة من تهم هتك العرض والتحرش المتهم فيها من بنات كتير.
السبب في الإشاعات دي هو انتشار بعض عناوين الأخبار اللي أوحت للناس إن زكي أخد براءة من كل التهم في قضيته، بس مع البحث والرجوع لأوراق قضية أحمد بسام زكي عِرفنا إن دي مش الحقيقة.
صدر ضد أحمد بسام زكي مجموعة أحكام بالحبس ووصلت مدة الحبس لحد دلوقتي لـ 11 سنة سجن ولسه محبوس على ذمة الأحكام دي، وصدر أخر حكم ضده في 11 أبريل 2021.
تمت إدانة أحمد بسام زكي بارتكاب جرايم التحرش الجنسي وكان الحكم الصادر ضده بخصوص الجريمة دي هو الحبس تلات سنين، وأقرت المحكمة في حكمها وحيثياتها بإن سلوك المتهم وصل لممارسة أفعال شاذة عن عادات وتقاليد المجتمع المصري بحق المجني عليهن.
تمت إحالة المتهم أحمد بسام للمحكمة الجنائية في قضيتين؛ الأولى في 29 ديسمبر 2022 وصدر فيها حكم بحبسه تلات سنين كعقوبة على ارتكابه جرايم التحرش والتحرش الجنسي وتعمد المضايقة بإساءة استخدام أجهزة الاتصالات، واستأنف محامي زكي على الحكم ده ولسه الاستئناف منظور أمام محكمة النقض وماصدرش فيه حكم لحد النهارده.
القضية التانية كانت أمام محكمة الجنايات وصدر فيها حكم في 11 أبريل 2021 بالحبس سبع سنين كعقوبة ارتكاب جرايم هتك العرض وسنة واحدة على ارتكاب جريمة تعاطي مواد مخدرة. وكده، حكمت محكمة الجنايات على المتهم بعقوبة قدرها تمن سنين حبس في القضية التانية، ومجموع القضيتين على بعض يساوي 11 سنة حبس للمتهم. قدم محامي زكي طعن بالنقض على الحكم بالحبس تمن سنين، ولحد دلوقتي محكمة النقض مابدأتش النظر في الطعن ده.
إيه حكاية براءة أحمد بسام زكي اللي انتشرت على السوشيال ميديا؟
بعض صفحات الأخبار نشرت عناوين مضللة بخصوص الحكم الأخير على زكي في القضية التانية واللي المحكمة كانت بتنظر فيها اتهامه بهتك عرض تلات بنات والتحرش بهم وإغرائهم بالخديعة لبيته لإرتكاب جريمة هتك العرض.
العناوين الإخبارية المضللة بخصوص براءة زكي من تهم التحرش والإغراء أوحت لمستخدمين السوشيال ميديا إن المتهم أخد براءة من كل التهم المنسوبة له. ولكن الحقيقة إن زكي محكوم عليه بالحبس 11 سنة لحد دلوقتي، ولكن رغم إن المحكمة حكمت عليه بالحبس سبع سنين في القضية التانية إلا إن حيثيات المحاكمة ماقدرتش تثبت عليه تهمة التحرش الجنسي والإغراء بالخديعة وبالتالي حصل على حكم براءة في التهمة دي بس.