ظهرت الفنانة حورية فرغلي ضيفة مع الاعلامي عمرو الليثي على قناة الحياة امبارح بعد ما رجعت من رحلة علاج طويلة برا مصر، واتكلمت فيها عن حياتها قبل وبعد العمليات وازاي الناس اتعاملوا معاها لما كانت تحت الأضواء وبعد كده بعدوا عنها، واتكلمت كمان عن المشاكل النفسية والأزمات اللي عدت بيها في حياتها، وده ملخص للتصريحات اللي اتقالت على لسان حورية فرغلي خلال اللقاء اللي اتصدر محركات البحث في جوجل وبقى تريند بعد ساعات من عرضه.
- عملت دور بطولة في فيلمين مع محمد رمضان بدون مقابل علشان خاطره، وبعدها شوفته في مكان وتجاهلني ومارضيش يسلم عليا.
- والدي انفصل عن والدتي وأنا عندي 48 ساعة، وماسألش عليا في محنتي ولا وقت إجراء العملية، وراهن على فشل العملية وقاطعني من فترة.
- اتعرضت للسحر قبل كده، لما كنت مريضة ووزني وصل 49 كيلو وبعدها جابوا شيخ ولقى في الزرع حاجة مدفونة مكتوب عليها “حورية بنت نادية تصاب بالمرض، وتكون طريحة الفراش وتتحرم من الخلفة والزواج”.
- ندمت على تقديم مسلسل “دكتور أمراض نساء” واعتبرت المسلسل ساقطًا ورجعت ليهم الأجر.
- بعت بيتي علشان أعرف أسافر أعمل العمليات في أمريكا وعلشان أجيب ثمن إقامتي هناك.
- اتفسخ خطوبتي بسبب مشاهد من فيلم “كلمني شكرًا” وندمت على الفيلم ده وعلى كل المشاهد اللي فيه وأتمنى يتمسح من تاريخي الفني.
- ربنا حرمني من نعمة الإنجاب بسبب مرض وراثي، واستأصلت 7 أورام ليفية من الرحم.
- كنت بتفرج على حفلة تتويجي كملكة جمال مصر وبعيط بعدها، وماكنتش ببص لنفسي في المراية لمدة سنتين وفقدت الإحساس بنفسي كأنثى.
- مريت بلحظات اكتئاب واعتزلت عن الحياة أنا وكلابي وكنت بدعي على نفسي كل يوم بالموت.
- ماحدش من الوسط الفني بيعزمني على أي مناسبة، وروحت لدكتور نفسي في أمريكا.
قراءة المزيد
اللي شاف حلقة حورية فرغلي مع عمرو الليثي، هيكتشف كمية قهر ووجع عاشته في حياتها وينبهر ازاي قدرت تتخطى وتعدي كل ده لوحدها وماحدش كان معاها حتى أقرب الناس ليها تخلوا عنها، حورية بقصتها وأزماتها اللي عدت بيها بتضرب لنا مثال للست القوية اللي مهما شافت، عندها إيمان قوي بربنا حتى لو كل الناس اتخلوا عنها.