بمناسبة دخول الشتا ومن خلال بث مباشر استمر لمدة 28 ساعة على قناته على اليوتيوب، قدر اليوتيوبر الكويتي الشهير أبو فلة إنه يجمع مليون دولار بمناسبة وصوله لـ20 مليون متابع ويستخدمهم لتوفير احتياجات الآلاف من الأسر اللاجئة خلال فصل الشتا.
أبو فلة مثال يحتذى بيه وده اللي فعلًا يستحق إننا نقول عليه “انفلونسر” لإن هو ده المفهوم الصح واللي المفروض يكون عليه كل مشاهير السوشيال ميديا والبلوجرز، إنهم يقدموا محتوى حقيقي ومفيد للمجتمع ونابع من مسئوليتهم تجاه الناس اللي بيتابعوهم، مش مجرد أي كلام بيتقال وخلاص لجذب عدد أكبر من المتابعين، وللأسف احنا شوفنا عدد كبير من الشخصيات واللي بيتقال عليهم للأسف “انفلونسر” مش بيقدموا محتوى هادف للجمهور، هتلاقي اللي في منهم بيستعرض عيشته والفلوس اللي عنده وأفراحهم المبالغ فيها واللي خلى الناس توقعاتها عن الجواز والحياة بشكل عام يزيد، مع إن الحياة والعيشة أبسط من كده وكلها مظاهر من برا بس.
وفي برضه بعض المشاهير الشباب اللي بستخدموا صفحاتهم ويقدموا محتوى أقل حاجة نقولها عليها إنه “إسفاف” وشوفنا مؤخرًا واحد منهم كل محتواه بيشجع على التحرش عن طريق إنه التريقة اللي بيتريقها على لبس البنات وبالألفاظ اللي بيستخدمها، هل هو ده اللي المفروض يتقال عليه انفلونسر؟ وهو ده اللي المفروض الناس تتابعه؟ احنا محتاجين محتوى حقيقي وبجد يناسب كل الفئات العمرية ويطور من الناس ومن فكرههم وثقافتهم، مش ياخدها ويخسف بيها الأرض! ونتيجة كل ده هيطلع أجيال مشوهيين فكريًا!
