وسط ظروف صعبة.. نماذج عربية مشرفة في 2020

في سنة صعبة على كل الناس، وأثرت على كل المجالات بالسلب، بسبب انتشار وباء في العالم كله وفيروس قلب كل الموازين، وسط كل ده فيه نماذج عرفت تكون على طريقها وتحقق نجاحات وتخلي العالم كله فخور بيهم، وقدروا يحققوا إنجازات في وقت الناس كلها خططها باظت فيه، وفي نماذج لمعت السنة دي والمبهر كمان إنهم في كذا مجال، كل واحد فيهم قدر يبقى بطل ونموذج تفتخر بيه بلده، وفي نهاية السنة الصعبة دي، عايزين نركز على النجاح والقصص اللي مليانة بإنجازات وتحدي لكل صعب، علشان نقدر نكمل وسط الظروف الصعبة دي ونتفادى السلبيات اللي بقت منتشرة حوالينا في كل حتة.

بيج رامي

المصري بطل مسابقة مستر أولمبيا 2020، اللي قدر يتفوق على كل أبطال العالم السنة دي في المسابقة، رغم إنه كمان أصيب بكورونا لكنه تعافى وقدر يرجع تاني أقوى من الأول ويشارك في البطولة، ويفوز بيها لأول مرة في تاريخه، وده عمل فرحة كبيرة في الوسط الرياضي لتتويجه بالبطولة الأشهر والأقوى في العالم.

ريما دودين

أول امرأة من أصول عربية تعين نائبة لمدير الشؤون التشريعية في البيت الأبيض، وده إنجاز كبير استغربه رجال السياسة في أمريكا، ريما من أصول فلسطينية، عينها جو بادين ضمن فريقه بعد فوزه في الانتخابات الأمريكية وتوليه الحكم، ريما حاصلة على بدرجة البكالوريوس في الاقتصاد والعلوم السياسية من جامعة كاليفورنيا، في الـ 15 سنة اللي فاتوا، وكانت بتعمل في الكونجرس الأمريكي ومجلس الشيوخ.

ميار شريف

من النماذج المشرفة في 2020، وهي أول لاعبة تنس مصرية تحقق بطولة تشارلستون الدولية للتنس بأمريكا، البطلة الملقبة بـ “فتاة مصر الذهبية”، وميار دخلت التاريخ، وحققت إنجاز غير مسبوق في تاريخ التنس بمصر السنة دي، وحققت 16 فوز.

هالة السعيد

الدكتورة هالة السعيد فازت بجائزة أفضل وزيرة عربية السنة دي، وزيرة التخطيط والتنمية الاقتصادية هالة السعيد حققت إنجازات في الوزارة ومزيد من التطوير الحكومي في عهد الرئيس عبد الفتاح السيسي، وهي خبيرة اقتصادية وأكاديمية مصرية بارزة، وتُعتبر دينامو التنمية المستدامة والتحول الرقمي في مصر، وبتدعم الشباب دايمًا سواء جوا الوزارة أو عمومًا، وبتساندهم من خلال إنشاء مشاريع خاصة ودعم ريادة الأعمال، وده كله زود من فرص فوزها بالجائزة اللي تُعتبر الأولى من نوعها على مستوى العالم العربي والأكبر عربيًا في مجال التطوير والتحسين والتميز الإداري.

مي زايد

مخرجة الفيلم الوثائقي “عاش يا كابتن”، اللي كسب 3 جوائز في مهرجان القاهرة السينمائي الدولي السنة دي، والفيلم بيركز على قضية مختلفة بيسلط عليها الضوء وبالفعل نجح في ده، وهو ده الإنجاز، بالرغم من إنه فيلم تسجيلي والمعروف عمومًا إن الأفلام التسجيلية خصوصًا الفترة دي مش بتنجح زيّ ما متوقعلها في إنها توصل رسالة للجمهور أو إنها تفوز بجائزة، والفيلم ده كسر القواعد وحصل على أكتر من جائزة في مهرجان واحد.

عبد النبي قابيل

عبد النبي قابيل وهو أستاذ هندسة القوى الميكانيكية بكلية الهندسة في جامعة طنطا، حصل على المركز الأول في قائمة أحسن 500 باحث في مجال الطاقة الشمسية وتحلية المياه في العالم، ويعتبر الدكتور قابيل هو أعلى باحث في النشر الدولي في تاريخ جامعة طنطا، وليه أكتر من 350 بحث دولي اتنشرت في مجلات عالمية، متخصصين في مجالين أساسيين وهما الطاقة الشمسية وتحلية المياه، وفي أكتر من 6 آلاف استشهاد مرجعي لأبحاثه في قاعدة البيانات الدولية Scoups.

آخر كلمة: ماتفوتوش قراءة: في مجالات مختلفة: تعالوا نحتفل بأبطال سنة 2020

تعليقات
Loading...
Tweet
Share
Share
Pin