حققت نهاية مسلسل بالطو، اللي اتعرض آخر حلقتين منه يوم الأربع ٨ مارس 2023، نجاح جماهيري كبير، واتعلق المشاهدين بحلقات المسلسل الكوميدي بشكل فاجئ صُناع العمل نفسهم.
وكانت حولت منصة (واتش إت Watch it) المصرية رواية (بالطو وفانلة وتاب) للكاتب المصري أحمد عاطف فياض، لمسلسل كوميدي خفيف من إخراج عمر المهندس، وبطولة الممثل الشاب عصام عمر( دكتور عاطف) والفنانة مريم الجندي (دكتورة هاجر)، ومجموعة من الفنانين المصريين.
إعجاب الجمهور بالمسلسل كان واضح في ردود فعلهم على منصات التواصل الإجتماعي، بيقول عمر البانوبي: “مسلسل بالطو دليل على إن الشباب عندهم اللي يقدموه”.
المسلسل ارتبط بقضية حقيقية من واقع الجمهور، وبيقول محمد حسين: “المشكلة إن الدنيا مسلسل بالطو، وأنت عاطف بجد”.
ومع نهاية مسلسل بالطو، عبر الجمهور إنه هيوحشه، بيقول عمر الشيخ: “من الحاجات الحزينة إن مسلسل بالطو خلص النهارده”.
المسلسل عجب الجمهور لإنه عمل شبابي طازج، اتضح فيه بشكل كبير محاولتهم لتقديم كوميديا خفيفة من واقع الشعب المصري، على عكس الأعمال الكوميدية اللي ظهرت خلال السنين اللي فاتت، واللي كانت بتعتمد على كوميديا مستهلكة ومنفصلة عن واقع المصريين.