مين قال إن الدفا والشياكة مايجتمعوش؟ إزاي تلبس شيك وفي نفس الوقت تتدفى

معروف إن لبس الشتا أشيك بناءً على نظرية إحنا عملناها خلاص، بس في الأيام السقعة أوي والبرد اللي إحنا فيها دي، القاعدة بتقول إننا بنلبس الدولاب كله علشان نتدفى، وفي الغالب شكلنا بيبقى عشوائي ومتكلفتين بالسكارف أو أي حاجة نلاقيها قدامنا، وطلعت من هنا نظرية إن الدفا والشياكة مايجتمعوش، بس إحنا قررنا نغير النظرية دي دلوقتي ونثبتلكوا إن إحنا ممكن نلبس لبس يدفينا وفي نفس الوقت يفضل شكلنا شيك.

في الغالب النظرية دي هتتحقق بطريقة هي اللي بتغلب، وهي إننا نعتمد على قطعة أساسية واحدة خامتها تقيلة، زيّ البالطو اللي من خامة الجوخ أو الصوف التقيل، أو الجواكت الـ Bomber اللي بتكون متبطنة بسفنج، ودي حاجات هتدفينا ومش هتخلينا نحتاج نلبس طبقات كتير من الهدوم، فمثلًا بلوفر واحد تحت أي قطعة منهم هيكون كفاية، ونقدر كمان ننسق ألوانهم بسهولة لإن القطع اللي في الإطلالة كلها هتكون عددها قليل.

وطبعًا مانقدرش ننسى البطل الرسمي لكل سنة، الجاكيت الجلد اللي مش بيخلينا محتاجين طبقات كتير من الهدوم، وبيدي شكل حلو شيك للطقم كله بأقل مجهود في تظبيطه.

وغير القطعة الأساسية اللي بتكون من برا، انت ممكن تعتمد على استراتيجية إنك تتقل من تحت وتلبس اللي انت عايزه، بمعنى إنك تلبس بيزك خامته تقيلة زيّ الصوف أو تعتمد على الاتجاه اللي منتشر جديد اللي بتكون فيه القطع متبطنة بقطيفة، دي حاجات هتدفيك لو لبستها وبعدين لبست عليها أي حاجة زيّ مثلًا القميص الكاروهات اللي طالع موضة جدًا دلوقتي.

عن: وصلة

وبما إن دلوقتي الفرو مش مقتصر على الشال الفورير بتاع الأفلام القديمة بس، ودلوقتي عندنا فرصة نلبسه على الموضة لإنه بشكل جديد في جواكت كاجوال مش بس كلاسيك، وشكلها لوحده بيدي إحساس بالدفا، ومش بتحتاج تلبس معاه سبعين قطعة علشان تتدفى.

آخر كلمة: ماتفوتوش قراءة: حاجة أساسية في الشتا.. إزاي تنسق الجاكيت الجلد بأكتر من طريقة

تعليقات
Loading...
Tweet
Share
Share
Pin