مهرجان جديد في مصر للسينما الفرنكوفونية في شهر ديسمبر

مصر هتستضيف مهرجان القاهرة السينمائي الفرنكوفوني الأول CFFF من يوم 10 لـ 14 ديسمبر 2020، تحت إشراف وزارة الثقافة، وبمشاركة شبكة TV5Monde الدولية، وهدف المهرجان هو وصول الأفلام لعدد أكبر من الجمهور، وتقوية روابط صناعة السينما في مصر بالبلاد المشاركة من ثقافات مختلفة. وللي ميعرفش يعني إيه فرنكوفون هي كلمة معناها يعني أي شخص أو أي حاجة بتنتمي للغة أو البلاد الفرنسية.

رئيس المهرجان “ياسر محب” الناقد السينمائي، حصل على موافقة إقامة المهرجان من وزارة الثقافة في شهر فبراير اللي فات من 2020، وتعاونوا مع مختلف العوالم الثقافية والسينمائية من دول المنظمة الفرنكوفونية، وصرح إن المهرجان تعاون مع 88 دولة، من خلال فتح طرق جديدة للنقاش والتبادل الثقافي بين مدارس وخبراء السينما من مصر والبلاد الفرنكوفونية، وده حصل علشان نزود قيمة لساحة السينما، والثقافة، والإبداع في مصر. ومدير منطقة المغرب والشرق الأوسط بشبكة قنوات TV5Monde العالمية “نبيل بو حجرة”، وضح قد إيه هو سعيد ومرحب بالمشاركة في المهرجان الجديد.

عن: unsplash

المهرجان بيضم مسابقة للأفلام الروائية الطويلة المنتجة من الدول الفرنكوفونية، ومسابقة للأفلام باللغة الفرنسية، ومسابقة للأفلام الوثائقية والروائية القصيرة، وتم تقديم أكتر من 40 فيلم من أول شهر سبتمبر الحالي، وباب التقديم هيستمر لشهر نوفمبر من 2020، والأفلام دي بتتعرض حاليًا على لجنة المشاهدة واختيار الأفلام، واللجنة دي هي اللي هتقرر وتحدد الأفلام اللي هتتعرض في المهرجان اللي هيستمر لمدة خمسة أيام.

عن: facebook

والمهرجان كمان هينظم ورش عمل وأنشطة زي “أمسيات مهرجان القاهرة للفيلم الفرنكوفوني” اللي هتعرض مجموعة من الأفلام المختارة في المواقع التاريخية المصرية الكبيرة في القاهرة، لدعم السينما في مصر والدول الفرنكوفونية، وده طبعًا باتباعهم للاجراءات الاحترازية والاحتياطية للوقاية من انتشار وباء كوفيد 19، وضمان الحرص على سلامة الجمهور، الضيوف، والمشاركين.

آخر كلمة: اهتمام مصر بالسينما في تطور واضح بمهرجاناتها…

تعليقات
Loading...
Tweet
Share
Share
Pin