حورية فرغلي ممثلة ليها سحر وطابع خاص، أدوارها كلها مختلفة، وبتعرف توصل إحساس كل شخصية رغم اختلافها عن شخصيتها الحقيقية، بتعرف إزاي تتقمص الدور بطريقة تخليك تحس الشخصية اللي في العمل، رغم مسيرتها الفنية القصيرة، لكن قدرت تسيب علامة مميزة في السينما والدراما، توقفت حورية عن الفن بسبب إصابة في بطولة للفروسية، أدت لمشاكل صحية كتير ليها لسه بتعالجها لحد دلوقتي، لكننا بنتمنى ليها إنها تقدر تتغلب على كل المشاكل اللي بتواجهها وترجع تبهرنا بأدوار جديدة، ولحد ما ترجع للفن، فتعالوا سوا نفتكر أهم المحطات في حياتها الفنية وأدوار مش هننساها في أعمال فنية مختلفة.
حكايات بنات
يعتبر بداية تعلقنا بحورية فرغلي وبدايتها في الدراما من خلال دور كاميليا، واحدة من الأربع بنات الأبطال في الجزء الأول من المسلسل في 2012، بشخصية خلتنا نختلف ونتعاطف معاها في نفس الوقت، وقدرت في مشهد واحد في الحلقة الأخيرة إنها تخلينا نعيط من غير ما تبذل مجهود، لما لأول مرة تشيل بنت صاحبتها مريم، وبتقدر حورية في المشهد ده تعبر عن ألمها الشخصي لإن الموقف ده حقيقي في حياة حورية لمشكلة صحية أدت لإنها اضطرت تشيل الرحم قبل ما تخلف.
بدون ذكر أسماء
وسط خيوط درامية متشابكة بقلم وحيد حامد، في مسلسل بتدور أحداثه في التمانينات، قدمت حورية دور نوارة، البنت اللي بتسافر السعودية مع جوزها غصب عنها، وبيرجعوا عندهم فكر وهابي، وأهلها مفيش في إيدهم حاجة غير إنهم يباركوا الجوازة دي، اللي مصيرها مجهول، لكن بحكم الظروف المادية بيضطروا ليها، وعملت حورية الدور بإتقان أوي يخليك تحس إنها فعلًا بنت من الزمن ده والطبقة دي مش مجرد تمثيل.
كف القمر
بدور مختلف، قامت فيه بدور راقصة تنورة بتشتغل في فرقة فنون شعبية في شارع محمد علي، الفيلم بتدور قصته في إطار دراما إنسانية، بترصد حياة ست صعيدية اسمها قمر، ليها خمس ولاد بتعتبرهم كف إيدها، وبعد موت أبوهم وبسبب ظروف المعيشة بيضطر كل واحد منهم يسافر علشان يدور على رزق، لكن هيكتمل الكف مرة تاني قبل فوات الأوان.
ديكور
في فيلم بنمط بسيط وهادي، قدمت فيه دور مها، مهندسة ديكور بتحب الأفلام القديمة، خصوصًا أفلام فاتن حمامة، بتلاقي نفسها تايهة بين عالمين مش عارفة تثق في أنهي فيهم، ومش عارفة أنهي فيهم عالمها الحقيقي وأنهي منهم مجرد وهم خلقه عقلها، عالم منهم هي فيه زوجة لشخصية بيقدمها ماجد الكدواني، والتاني زوجة لشخصية بيقدمها خالد أبو النجا.
دوران شبرا
بمشاركة أبطال ونجوم كتير قدمت شخصية عزة، في مسلسل بتدور أحداثه في حي شبرا، بين مجموعة من الشخصيات اللي ساكنين فيه، ومن خلال حياتهم بيوضح المسلسل مدى التسامح اللي بين سكان شبرا من مسلمين ومسيحيين في أعمار وأشكال مختلفة، بتقدم فيه حورية شخصية عزة.
ساحرة الجنوب
ببطولة مطلقة، قدرت حورية تثبت نفسها في نوع مختلف من الفن وهو الرعب، وعرفت تقنعنا بدورها “روح” البنت الصعيدية اللي ليها اتصال بعالم الجن والشياطين، وعن طريق السحر، بتقوم بخلق مشاكل كتير بين أهالي القرية، وبتحاول تثبت إنها مش ملعونة وإن مالهاش ذنب في كل اللي بيحصل.