من رجاء الجداوي لمحمود رضا، “الجونة” بيحيي ذكرى فنانين وحشونا

في فعاليات مهرجان الجونة بدورته الرابعة، حرصت إدارة المهرجان بشكل رسمي، وكمان الفنانين بشكل شخصي، على إنهم يكرموا الفنانين اللي رحلوا عن عالمنا السنادي وفقدنا وجودهم وسطنا، نجوم أثروا فينا بشخصياتهم الحقيقية وبأعمالهم الفنية اللي هتفضل في ذاكرتنا وهيفضلوا عايشين بسيرتهم وأعمالهم اللي متتنسيش، تعالوا نشوف إزاي تم تكريم الفنانين الراحلين في مهرجان الجونة السنادي.

بروش بصور الفنانين

في لفتة جميلة، وتحت شعار “نجوم في السماء”، صمم مجموعة من فناني الحرف اليدوية لمبادرة “إبداع من مصر” بالتعاون مع مؤسسة “ذات” الاجتماعية والمفوضية السامية للأمم المتحدة لشئون اللاجئين، اللي قدروا إنهم يساعدوا أكتر من 50 امرأة من جنسيات مختلفة عن طريق صنع بروش مرسوم عليه صور لبعض الفنانين الراحلين زيّ رجاء الجداوي، وشويكار، وحسن حسني، اللي رحلوا عننا السنادي بعد مسيرة فنية طويلة ومؤثرة، واتوزع البروش على الحضور في حفل افتتاح المهرجان.

فيديو حفل الافتتاح على أغنية “حكاية حب”

في حفل الافتتاح، حرصت إدارة المهرجان إنها توجه التحية لأرواح الفنانين الراحلين في 2020، من خلال عرض صورهم ولقطات من أشهر أعمالهم، على خلفية أغنية “حكاية حب” اللي قدمتها الفنانة فرح الديباني، ومن خلال ده افتكرنا قد إيه الفنانين دول أثروا في تاريخ السينما وسابوا بصمة مميزة نفتكرهم بيها طول حياتنا.

عرض فرقة رضا

ومن حفل الافتتاح برضه، تم تقديم عرض من عروض فرقة رضا، اللي تعتبر نقطة تحول في تاريخ الفنون الشعبية بمصر، واللي أسسها الفنان محمود رضا، ورحل عن عالمنا السنادي، فبعد تأبينه من خلال كلمة بنته الفنانة شيرين رضا في الحفل، اللي ذكرت فيها: ” فهمت يعني إيه مسرح والتزام لما جيت أرقص مع فرقة رضا وأنا عندي 14 سنة، وساعتها عرفت قد إيه بيتعبوا وعرفت إن أبويا كان عنده حلم يخلق فن شعبي راقي، ويعرف الناس بالفن المصري الأصيل”، شهد المسرح بعدها استعراضات الفرقة على أشهر أغانيها “حلاوة شمسنا”.

إهداء جائزة خالد الصاوي لروح الراحل خالد صالح

خلال تكريم الفنان خالد الصاوي بجائزة “الإنجاز الإبداعي”، قال إنه سعيد بالتكريم ده خصوصًا إنه من مهرجان الجونة، لإنه بيعتبر إن بعض المهرجانات بتقوم بالتكريم على سبيل المجاملة، لكن مهرجان الجونة مش من المهرجانات دي، وأهدى الجائزة لروح الفنان خالد صالح، اللي كان بيربطهم علاقة صداقة قوية جوه وبره الوسط الفني.

آخر كلمة: تحية لكل الفنانين اللي رحلوا عن عالمنا ولكل اللي اهتم يكرمهم.

تعليقات
Loading...
Tweet
Share
Share
Pin