من المطبخ اليوناني للمطبخ العربي: أكلات مشتركة بأسماء مختلفة

المطبخ اليوناني من أقدم المطابخ في العالم وبيشبه كتير في وصفاته ومكوناته المطبخ العربي، وبيتميز باستخدام توابل وبهارات كتيرة بنستخدمها في أكلاتنا العربية زي الزعتر، والروزماري، والنعناع، والمستكة، والريحان، وورق اللورا، وغيرهم كتير من النكهات المميزة اللي متعودين عليها. وكمان بيعتمد بشكل كبير علي الخضروات مع اللحوم البيضاء والأرانب، وبيتبع حمية البحر المتوسط، مش بس كده، ده كمان عندهم أكلات مشهورة في الشرق الأوسط بس باسامي مختلفة، هنقدملكم بعضها.

دولمادس

عن: CDkitchen

وده عبارة عن محشي ورق عنب زي اللي عندنا بالظبط بيكون محشو بالرز المخلوط بالتوابل، ومغلي بمرقة مشبعة بدهن الخروف، ودي تعتبر من أشهر الأكلات اليونانية.

كيفتيدس

ودي بتشبه كفتة داوود باشا لكن باختلاف شوية في خلطة اللحم قبل التسوية، الاختلاف ده هو إنهم بيخلطوا اللحم البقري المفروم مع الخبز المبلل والنعناع والبصل المبشور وصفار البيض، وبعدها بيتم تشكيلها علي شكل كرات وبتتغطي بالدقيق وبتتقلي في زيت زيتون.

الأطباق العربية واليونانية مش بس بتتشابه في الأطباق الرئيسية أو الحوادق، ده كمان في الحلويات زي:

حلوى لوكوماديس

عن: Cairo dar

ودي تعتبر هي هي الزلابيا أو لقمة القاضي عندنا، بنفس الطريقة والمكونات، كرات عجينة مقلية بتتغمس في العسل وبيضيفوا عليها قرفة.

حلوى البوجاتسا

ودي هي البقلاوة عندنا، بتتعمل هناك بعجينة البقلاوة أو القطايف، وبتتعمل بنفس طريقة البقلاوة عندنا، وبتتزين بالعسل والمكسرات وأوقات بيزودوا عليها كمان الكاسترد.

آخر كلمة: المطبخ اليوناني شبيه جدا للشرق الأوسط، قولولنا في التعليقات إيه أكتر أكلة عجبتكم فيهم.

تعليقات
Loading...
Tweet
Share
Share
Pin