من السودان للمغرب، جمعنالكم أغرب تقاليد الزواج العربية

أجدادنا ابتكروا طقوس للزفاف فريدة من نوعها وفيها شيء من الغرابة، وحطوا قاعدة بتقول إن العادات دي بتجيب حظ سعيد وحياة زوجية صحية وبتبعد الحسد. وتم توارث الطقوس دي من جيل لجيل من غير التفكير في سبب وجودها أو مدى صحتها.

ودي شوية من أغرب طقوس الزفاف اللي متبنيها بعض العرب. ولازم نحط في الإعتبار إن كل طقس من دول مختلف لكل عائلة أو قبيلة معينة ومش بينطبق أبدًا على كل السكان.

العراق

 في العراق، البنت اللي عايزة تتجوز بتكتب اسمها على جزمة العروسة في يوم الزفاف. أما في محافظة ديالي العراقية، بعض العائلات بتخلي طفل ذكر يتبوّل على فراش العروسين ليلة الزفاف، وبيعملوا كده كنوع من التبارك وإن العروس هتجيب مولود ذكر.

تونس

في مدينة صفاقس التونسية، العروسة بتنط فوق السمك كذا مرة عشان يجيلها حظ سعيد. وفي مدينة بنزرت، العروسة بتجر برجلها سمكة مربوطة وبعدين بتنط فوقيها سبع مرات قبل ما تكون أول حد ياكل منها عشان تبعد الشر والحسد.

المغرب

في محاولة لطرد الشر وإعلان بداية حياة جديدة، العروسة المغربية ممكن تكسر بيضة مرسومة بالحناء على حيطة بيتها الجديد في ليلة زفافها.

البحرين

عن Pinterest.

مع بداية طقوس الزفاف في البحرين، في وعاء من الفخار بيتحط وسط باحة البيت وبيقعد العروسين قدام بعض وبيحطوا رجلهم في الوعاء بحيث ان إبهام كل واحد يتلامس بإبهام الآخر، وبعدين العريس بيرمي قطع نقدية في الوعاء.

لبنان

في لبنان، في عرائس بيلزقوا قطعة من العجين على باب بيتهم الجديد كنوع من التفاؤل.

السودان

خلال رقصة العروسين الثنائية في الزفاف في السودان، العروسة بتحاول ترمي نفسها على الأرض. وفي كل مرة العريس لازم يحاول يمسكها قبل ما تقع عشان مايتعرضش لسخرية المدعوين.

مصر

في مصر، بعد ما العروس تلبس ملابسها، البنات العازبات بتقف حوليها وتقرص العروس في ركبتها. بيقولوا إن ده هيزيد من فرصهم في إنهم يلاقوا عريس في حفل الزفاف.

ومن أغرب العادات اللي بتتعمل في مصر ومحدش لاقي أي تفسير ليها لحد دلوقتي هي “النيش”، وهو دولاب كبير بيتحط فيه أدوات للأكل والشرب ومحظور على العريس والعروس استخدامها. وممكن يفضل النيش في مكانه لأكتر من 20 أو 30 سنة من غير ما حد يجرؤ على استخدام أي حاجة فيه، لدرجة إن أحفاد العروسين بيعتبروه شيء مقدس.

الإمارات العربية المتحدة

في الإمارات، في قبيلة معروفة اسمها “الشحوح”، الشاب اللي عايز يتجوز بيجري ناحية منزل البنت اللي عايز يتجوزها وبيقلع أي قطعة ملابس من اللي لابسها وهو بيجري، ودي بتكون علامة للبنت على أنه مستعد يتخلى عن أي شيء حتى الحاجة اللي بتستره مقابل أنه يتجوزها.

آخر كلمة: متفوتوش قراءة:النهاردة واحد توت، ودي قصة الشهور القبطية في مصر القديمة..

تعليقات
Loading...
Tweet
Share
Share
Pin