في الفترة الأخيرة كان في نقاشات جادة داخل المجتمع المصري بخصوص أضرار تعدد الزوجات بالذات على الزوجة الأولى، وتداولت المناقشات دي مَدى عدالة الزواج من ست تانية من غير ما الزوجة الأولى تعرف. النقاش الأخير ده بالذات بدأ ياخد مساحة أكبر على الساحة المصرية بعد خبر زواج الكابتن بيج رامي، لما اتجوز على مراته من غير ما تعرف، وقالت إنها اتصدمت من الخبر واستغربت ازاي عمل كده بعد ما وقفت جنبه طول حياتهم في كل إنجازاته.
مشروع قانون منع تعدد الزوجات بدون إذن قضائي
انتشر خبر عن مشروع قانون جديد للأحوال الشخصية في مصر بخصوص منع تعدد الزوجات بدون إذن قضائي، وسبب الخبر ده موجة من الجدل على السوشيال ميديا.
ونص القانون الجديد، اللي هيتم مناقشته في الجلسة العامة لمجلس النواب خلال الأيام اللي جاية، على ضرورة استدعاء قاضي محكمة الأسرة للزوجة الأولى علشان يعرف رأيها في الموافقة على الزواج من عدمه، وإنه مايتمش الزواج من غير ما ده يحصل، وكمان ضرورة إبلاغ الزوجة الجديدة بوجود الزوجة الأولى.
وفي تصريحات ل”سكاي نيوز عربية” قالت النائبة، نشوى الديب، اللي قدمت مشروع القانون لمجلس النواب: “اشتغلنا سنين كتير على مشروع القانون ده، وعملنا أكتر من حوار مجتمعي مع عدد كبير من أساتذة القانون والشخصيات العامة قبل ما نقدم المشروع للمجلس، وحاولنا نستفيد من كل الأراء علشان نضيف وجهات نظر مختلفة للقانون الجديد”.
وقالت كمان: “ظهرت ردود فعل كتيرة على مشروع القانون خلال الأيام اللي فاتت، بالذات بعد عرض واحدة من الدراما الرمضانية أزمة قانون الأحوال الشخصية في مصر”. وأضافت: “حاولنا بكل مجهودنا نوصل لمعنى العدالة في القانون الجديد ونحقق فيه مبدأ الرحمة بكل الأطراف الملزمة بالقانون”.
ازاي القانون نظم حالات رفض أو قبول الزوجة الأولى للزواج عليها؟
نظم مشروع القانون الجديد حالات رفض أو قبول الزوجة الأولى فكرة الزواج عليها، وكمان نظم حقوقها في حالة قبولها الاستمرار في الزواج، فنصت المادة الـ16 من مشرزع القانون على إنه “لو طلبت الزوجة الأولى الطلاق، هتحكم لها المحكمة بالحصول على حقوقها المالية الكاملة، ولازم على الزوج إيداع حقوق زوجته في خزينة المحكمة خلال شهر من تاريخ الحكم القضائي، وإلا هتعتبر المحكمة الزوج متراجع عن طلب الإذن بالتعدد”.
وطلبت النائبة، نشوى الديب، من كل الناس إنها تقرأ نص القانون قبل ما يحكموا عليه، وقالت: “ماتبنوش أراءكم على اللي بيتقال على السوشيال ميديا”، وأضافت: “احنا حاولنا بجد نكون عادلين لأقصى درجة من غير أي تحيز، وحاولنا تقديم مشروع قانون يقدر يحفظ كل الحقوق للزوج والزوجة”.
رأي الأزهر الشريف في تعدد الزوجات
قال فضيلة الشيخ، مجدي عاشور، عن قضية تعدد الزوجات إن التعدد مباح ولكن الأصل في الإسلام هو عدم التعدد، وأكد إن التعدد مباح بشروط قاسية جدًا، ومن الصعب تحقيقها في الظروف الاجتماعية الحالية لأمة المسلمين، وقال كمان إن الأصل في الشرع إن الراجل يتزوج من امرأة واحدة.
وأكد فضيلة الشيخ، أحمد الطيب، إن إباحة الشرع لتعدد الزوجات موجود بهدف حل المشكلات الاجتماعية اللي ممكن تحصل في بعض بيوت المسلمين، أما الأصل في الزواج إنه يكون من امرأة واحدة يكتفي بها الرجل، وأكد إنه مش الأصل في الزواج هو تعدد الزوجات.
ردود فعل السوشيال ميديا على خبر منع تعدد الزوجات بدون إذن قضائي
اختلفت ردود فعل مستخدميين السوشيال ميديا على خبر منع تعدد الزوجات بدون إذن قضائي، ما بين مؤيد ومعارض وناس مش عارفة تحدد رأيها بالظبط بخصوص القانون الجديد.
اعتبرت التويت اللي فوق دي إن تعدد الزوجات إهانة للمرأة، وإنها فكرة بتحط الستات في خانة “مواطنات من الدرجة التانية” في أحسن الأحوال أو “أحد الممتلكات في أسوأ الأحوال”.
كريم بيقول: “على قد مانا عارف إن الاسلام حلل التعدد بس أنا مبسوط إن القانون ده طلع علشان الرجال اللي بتقعد تتجوز أكتر من واحدة علشان عينهم فاضية وست واحدة ماكفتهمش والمفروض الاسلام حلل تعددالزوجات علشان اللي يقدر يدعم الأرامل مش علشان الراجل يدلع نفسه بكذا ست”.
أما أسامة فكتب: “تعدد الزوجات يعني: إختفاء الزنا. إختفاء الأرامل. إختفاء المطلقات. إختفاء أولاد الشوارع. إختفاء الدعارة. إختفاء الخيانة. إختفاء التبرج. إختفاء العنوسة. إنها صيدلية الإسلام، هي الحل الوحيد للقضاء على كل آفات المجتمع، بشرط العدل في كل شيء، وإلا لن يتحقق شئ مما سبق”.
سأل شعبان أبو طالب: “بسأل نفسي، لماذا ماتت رغبة تعدد الزوجات عند الرجال؟ هل لغلاء المعيشة؟ أم خوف من الزوجة الأولى، أو خوف من قانون هدم الأسرة برعاية المجلس القومي (لحقوق) المرأة؟”.
أخيرًا: إيه رأيك في نص مشروع القانون الجديد، وتفتكر ازاي هيأثر على الوضع الاجتماعي وقانون الأحوال الشخصية في مصر؟ تفتكر هيحل مشاكل أكتر ولا هيسبب مشاكل أكتر؟ سيب لنا تعليق برأيك.