مش بس الأكل والشرب.. استخدامات مختلفة لليمون

مش بس لما تتعصب وحد يقولك هعملك كوباية ليمون تروق دمك، ولا لما تحطه على السمك المقلي كده وتستمتع بطعم مختلف للوجبة كلها، أو على السلطة، مع احترامنا وحبنا لكل دول، بس مش دي الاستخدامات الوحيدة لليمون، اللي يعتبر مفيد جدًا في الأكل والشرب، بس برضه ينفع نستفيد منه في حاجات تانية كتير في المطبخ وبرا المطبخ كمان، تفتكروا ممكن تبقى إيه؟

معطر جو طبيعي

بسهولة جدًا تقدر تتخلص من أي روايح مش حلوة في البيت نتيجة الروايح النفاذة للحوم أو الأسماك وهي بتتطبخ، إزاي؟ هتحط قطع وشرايح ليمون في مياه وتسيبها تغلي على النار من غير ما تغطيها، بخار المياه مع الليمون وريحته هيقوموا بالمهمة من غير ما تتعب نفسك.

التلميع

تقدر ترجع المعادن لبريقها ولمعانها لو نضفتها بالليمون، مش بس أدوات المطبخ والحلل، كمان الإكسسوارات النحاس، تقدر ترجع شكلها جديد زيّ ما كان لو لمعتها بنص ليمونة بس، لإن الليمون بيحتوي على حمض الستريك اللي بيقدر يقضي على الصدأ في المعادن زيّ النحاس والفضة.

إزالة البقع

عن: Malekah

في الهدوم البيضا لو ظهر عليها علامات بقع صفرا، تقدري تشيليها بسهولة باستخدامه، هتعصري نص ليمونة على البقعة وتسيبيها شوية، وبعد كدة حطيها في الغسالة بشكل طبيعي.

ماسكات روتين البشرة

عن: aljamila

بيدخل في وصفات كتير في روتين العناية بالبشرة، وكمان في الاسكراب لتقشير البشرة من الجلد الميت وتفتيحها وتنضيفها، باستخدام عصير الليمون مع شوية سكر، بس لازم قبل ما تستعمليه في أي وصفة لماسك أو سكراب تتأكدي إن بشرتك مش حساسة علشان ساعتها هتبقى كارثة.

آخر كلمة: ماتفوتوش قراءة: استخدامات مش معروفة للميكروويف هتسهل عليك مهمات في المطبخ

تعليقات
Loading...
Tweet
Share
Share
Pin