بالصور: سحر وجمال بحيرة الملح في سيوة تخليها أكتر مكان متحمس إنك تسافرله

بعيدًا عن أي كليشيهات أو كلام تقليدي، فعلًا مصر من أجمل البلاد اللي فيها مدن سياحية بتخلي الناس تيجي من آخر بلاد العالم علشان تستمتع بيها وبجمالها. وحتى إحنا كمصريين في حاجات وأماكن كتير إحنا نفسنا مانعرفش إنها موجودة.. ولما بنشوف صور للأماكن دي، كتير ما بنصدقش إنها موجودة فعلًا عندنا. ومن أكبر الأمثلة عن الموضوع ده، واحة سيوة اللي فيها بحيرة الملح اللي لما تشوف صورها مش هتحس بنفسك غير وانت قايم تحضر شنطتك علشان تسافر على هناك.

بحيرة الملح في سيوة بيتم استخراج منها الملح المتواجد لحد عمق 18 متر واللي بنستخدمه بعد كده في أكلنا والمكان اللي بيتاخد الملح منه بيطلع مكانه ملح تاني بعد 6 شهور بس. وبيروح كتير من الناس البحيرة دي للاستجمام وكمان بتعتبر البحيرة دي علاجية، وبتخلي الإنسان يطفو على سطحها نظرًا لكمية الملح الموجودة، وده اللي بيساعد على عملية الاسترخاء وانت بتطفو على سطح بحيرة بالصفاء والجمال ده.

وده اللي بيخلي واحة سيوة مكان جذب لكتير من الناس وخصوصًا الأجانب اللي بيزوروا البحيرة مخصوص وبيسجلوا اللحظات دي علشان يشاركوا الناس التجربة ويدولهم معلومات عن الواحة وكمان يشجعوهم إنهم يزوروها.. وبعد الفُرجة على الصور والفيديوهات.. مين مش هيحب يزورها؟!

آخر كلمة: ماتفوتوش زيارة البحيرة دي، وماتفوتوش قراءة “كهف الجارة في الفرافرة.. لوحة سينمائية طبيعية.

تعليقات
Loading...