أدوار خلت النجمة دلال عبد العزيز تفوز بلقب “الأم” بجدارة

امبارح خسرنا نجمة على المستوى الفني، وأم على المستوى الإنساني، دلال عبد العزيز اللي ممكن تحط لها مليون سبب علشان تحبها، كان ليها علامات مميزة في الدراما المصرية، وعملت أدوار في مسيرتها الفنية لسه معلقة معانا لحد دلوقتي. قدمت خلال مسيرتها أدوار للأمهات كتير بس في كل دور فيهم كانت بتقدم نموذج مختلف للأم المصرية، وكان بيخطف القلوب في كل مرة.

سابع جار

دور لمياء الأم في مسلسل سابع جار، كان من أكتر الأدوار اللي علّمت مع الناس، بخفة دم الأم المصرية وازاي بتتعامل مع مشاكلها ومشاكل أولادها وبطريقة كلامها وأفكارها عن الحياة، خلتنا نحس بإنها جزء من عيلتنا، والمسلسل كله نجح في إنه يوصل لنا حالة البيت المصري بكل تفاصيله.

حديث الصباح والمساء

دور الأم نعمة في المسلسل كان علامة في تاريخها، المسلسل كان مليان بالأدوار الاستثنائية بشكل عام، ومن ضمنهم دور عبلة كامل اللي عملت علاقة صداقة استثنائية وقوية بين دلال عبد العزيز، وفي أخر مشهد لدلال في المسلسل، مشهد “الوفاة”، السيناريو والحوار اللي اتعمل في المشهد ده واللي كان رثاء لوفاتها، كان صادق وحقيقي وكان بيوصف دلال الحقيقية مش شخصية نعمة اللي في المسلسل.

لا تراجع ولا استسلام

قدمت فيه شكل الأم بصورة مختلفة، الأم ميار الفرفوشة، شخصية تفوقت فيها برغم قلة مشاهدها، بس عملت مع أحمد مكي دويتو كوميدي استثنائي بيتعمل كوميكس لحد النهارده.

ملوك الجدعنة

الأم “عطية” المغلوب على أمرها، المكافحة والصبورة اللي تقدر تحط نفسها في مليون كارثة ومصيبة بس ماحدش يؤذي أولادها، قدمت نموذج لأمهات كتير مكافحين بشكل خطف قلوبنا واتعلقنا بيه، وأتأثرنا بشكل كبير بعد أخر مشهد وفاتها في المسلسل.

أسف على الإزعاج

كانت أم لأحمد حلمي المريض بمرض الشيزوفرينيا، الداعمة لابنها علشان يعدي من أزمته، واللي كان مرتبط ارتباط شديد بوالده بعد وفاته.

مشاهد وأدوار النجمة دلال قادرة إنها تعلقك بيها وتعيشك في خليط من خفة الدم والعفوية والتفاصيل الموجودة في كل أم مصرية، بشكل يقدر الأم ومكانتها مش يقلل منها.

أسباب كتير ممكن تخلينا نحبها مش بس علشان مسيرتها الفنية وذكرياتنا اللي معاها، هي كانت على المستوى الإنساني أعظم، قدرت تعمل مكانة في قلوب كل الناس اللي عرفوها واتعاملوا معاها، وسيرة حلوة تخلينا نفتكرها طول العمر.

أخر كلمة: ماتفوتش قراءة: إيه سر سبحة دلال عبد العزيز اللي معاها من أكتر من 25 سنة ومش بتفارقها أبدًا؟

تعليقات
Loading...
Tweet
Share
Share
Pin