ازاي نقدر نتعامل مع فكرة فقدان شخص عزيز علينا؟ دي نصايح ممكن تساعد

فكرة الموت أو الفقدان عمومًا بتبقى مستبعدة من دماغ ناس كتير، اللي هو “أنا استحالة ده يحصلي في حياتي أو اتعرض لموقف زيّ ده” وبيبقى عند الشخص ده نوع من الثقة زيادة عن اللزوم مش عارفين جايبها منين، وكإن حياته عبارة عن واقع لوحده مستقل مقفول عليه مش هيمسه أي ضرر، المشكلة بتيجي من هنا بقى، لما تتصدم بفقدان شخص عزيز عليك وفجأة كل حساباتك وحياتك تتهدم قدام عينيك. ودايمًا المشكلة اللي مش بنبقى واخدين بالنا منها، إن إحساس الفقد عمومًا بيبقى مربوط دايمًا بخوف أكتر من إنه إحساس بالحزن، خوف من المستقبل إن “ازاي هكمل حياتي من غير الشخص ده!”، علشان كده جبنالكم شوية نصايح ممكن تساعدكم أو تساعد بيها حد تاني.

  • لازم تفهم نفسك إن الحزن أمر طبيعي ومشاعر طبيعية كلنا هنعدي بيها دلوقتي أو بعدين، الحزن مش ضعف زيّ ما معظم الناس فاكرة أو حاجة لازم نهرب منها، فكرة إنك تحس بالحزن وتعيط وتنهار دي كلها مشاعر سلبية وطاقة سلبية لازم تطلع ماينفعش تفضل مكبوتة.
  • ماتترددش أو تتكسف إنك تروح للدكتور لو الأمر محتاج ده، الدكاترة النفسية دلوقتي بقوا وسيلة مهمة من وسائل المساعدة، ممكن الدكتور يفتحلك في مواضيع انت كنت خايف تتكلم فيها أو مش عايز.
  • شارك مشاعرك، إنك تحكي وتفضفض لحد ده بيعمل نوع من تخفيف لحدة الحزن شوية، ده غير إنك لما تحكي لحد هيقدملك دعم نفسي كبير انت هتبقى محتاجه في الأيام دي.
  • قدم مساعدات لغيرك، للناس اللي حوليك أو حد ماتعرفوش عن طريق الأعمال الخيرية أو التطوع، ده هيملى حتة الفراغ الداخلي والمعنوي اللي سابه الشخص ده، وهيحسسك بسعادة داخلية لما تشوف حد مبسوط بسببك، هتجرب نوع جديد من السعادة مختلف عليك.
  • اسمع قصص لأشخاص عاشوا نفس تجربتك، واعرف منهم ازاي قدروا يتغلبوا عليها ويكملوا حياتهم عادي، فكرةإنك تشوف ناس شبهك مروا بنفس الموقف ده بيعمل نوع من أنواع الدعم المعنوي.
  • اشتغل على نفسك أكتر واملى وقت فراغك ومااتسبش نفسك للأفكار السلبية تسيطر عليك، اشغل نفسك بحاجات مفيدة.
  • اعمل خير على اسم الشخص ده، سواء بإنك تعمل صدقة جارية باسمه أو تدعيله وده هييجي لما تبتدي تفكر وتستوعب فكرة الفقد أو الموت بصورة تانية، ودي مرحلة متقدمة من التعافي ماتستعجلش عليها.

دي كانت مجموعة من النصايح ازاي تتعامل مع فكرة فقدان شخص عزيز عليك، بس أهم حاجة ماتستعجلش على إنك تتخطى أي صدمة وحشة هتمر بيها في حياتك، لإنك لازم تعدي بمراحل معينة وبعدها تبدأ في التعافي.

آخر كلمة: ماتفوتش قراءة: في الأوقات الصعبة: إزاي تقدر تدعم الناس بأبسط الطرق؟

تعليقات
Loading...
Tweet
Share
Share
Pin