على الرغم من إن كتير من الحرف اليدوية والتقليدية اختفت أو في طريقها للاختفاء مع سرعة الإنتاج الآلي وتقدم التكنولوجيا، في حرف تانية لسة باقية بقوة في مصر زي صناعة النسيج اليدوي اللي بتمثلنا في كل حتة في الدنيا، وده بفضل اشخاص بعينهم شافوا الجمال في الصناعات اليدوية، وسابوا بصمتهم فيها علشان تكمل معانا لحد دلوقتي ولسنين كمان قدام.
رمسيس ويصا واصف الفنان والمعماري المصري على رأس الأشخاص اللي آمنوا بالمواهب الفطرية والإيادي المصرية، وقدر في سنة 1951م إنه يأسس واحد من أهم مراكز صناعة السجاد والنسيج اليدوي في مصر والشرق الأوسط في قرية الحرانية بالجيزة علشان يحافظ على الحرفة دي، ويهدي لأهالي القرية المكان اللي يقدروا يبدعوا فيه بطريقتهم ويعبروا عن تفاصيل حياتهم.
اختار المهندس رمسيس إنه يبدأ رحلته مع الأطفال باعتبارهم أرض خصبة لتلقي كل جديد، وبعد ما علمهم قواعد الحرفة، إداهم الأصواف الملونة والأنوال والأدوات، وسابهم يطلقوا العنان لخيالهم ويطلعوا طاقاتهم المتخزنة. والمركز كان بيتضمن في البداية فنون محلية مختلفة مع النسيج اليدوي زي الخزف والفخار والباتيك، إلا إن المستمر لحد دلوقتي فيه هو النسيج بالنول اليدوي، والباتيك اللي هو فن الرسم على القماش بالشمع.
بواسطة: فيسبوك 
بواسطة: فيسبوك
كل قطعة بينتجها أهالي القرية هي عمل فني في حد ذاته، وخروج السجادة الواحدة في شكلها النهائي بيستغرق شهور طويلة ممكن توصل لسنة في بعض الأوقات. وأغلب الخامات اللي بيستخدموها في النسيج بيتم صناعتها بإديهم في المركز، فمثلاً الخيوط اللي بيستخدموها هي عبارة عن صوف الغنم الطبيعي اللي بيصبغوه بألوان طبيعية من النباتات المزروعة في حديقة المركز.
بواسطة: فيسبوك 
بواسطة: فيسبوك
رحل الفنان واصف عن عالمنا سنة 1974م، وتولى المركز من بعده زوجته، وبعدها بناته اللي ماشيين على نفس المنهج بتاعه، وهما دلوقتي بيساعدوا الأهالي في أعمالهم الفنية علشان تفضل محافظة على سمعتها اللي وصلت للعالمية من سنين طويلة، كان أولها سنة 1958 لما شاركوا في معرض في سويسرا. وأعمال أهالي الحرانية مكتفتش بس بالمشاركة في المعارض الدولية، فإبداعاتهم وصلت لمتاحف العالم كله، وكان أخرها لما عرضوا منسوجاتهم في متحف جامعة جوشيبي للفنون والتصميمات باليابان مع المجموعة التاريخية للمنسوجات القبطية اللي كانت معروضة، وكانوا بيمثلوا وقتها فن النسيج المصري الحديث والمعاصر.