مراحل تطور العاصمة الإدارية الجديدة.. من صحراء لمدينة متكاملة

مفيش شك إن كلنا مستنيين نشوف العاصمة الإدارية الجديدة لما تخلص، والحكومة بتوجيهات من رئيس الجمهورية الرئيس عبد الفتاح السيسي شغالة عليها بقالهم كتير وكل شوية بيحمسونا أكتر للشكل الأخير اللي هيطلع، من مدينة وخدمات ومدارس وأندية، ولكن مش ده بس، فالعاصمة الإدارية الجديدة بتضم مباني الأولى من نوعها بنشوفها في مصر ويمكن كمان في قارة أفريقيا.

والحكومة أعلنت إنهم نفذوا 60 دور بالبرج الأيقوني اللي يعتبر أطول برج في قارة أفريقيا، فارتفاعه تقريبًا 400 متر في منطقة الأعمال المركزية، والمنطقة دي بتضم 20 برج والاستثمارات فيها بتقدر بحوالي 3 مليار دولار، وبيتم تنفيذها بالتعاون مع هيئة المجتمعات العمرانية الجديدة، وشركة (cscec) الصينية، وهي واحدة من أكبر شركات المقاولات في العالم.

العاصمة الإدارية كمان بتضم حديقة مركزية، والحديقة دي تعتبر أكبر حديقة مركزية في الشرق الأوسط وتاني أكبر حديقة مركزية في العالم، وطولها أكتر من 10 كم، ومساحتها تقريبًا ألف فدان، وكمان في مساحات خضرا كبيرة وملاعب وبحيرات وممرات للعجل ومجمعات مطاعم ومناطق ترفيهية ومساحة مخصصة لإقامة مشروعات استثمارية مستقبلية.

عن: uvisne

والمشروع بيضم بحيرة القراءة والعلوم، وحديقة تعليمية للأطفال والساحة الاحتفالية والحديقة التراثية والنادي الريفي والنادي الرياضي والساحة المركزية ومجمع المطاعم والسينما المفتوحة والحديقة التفاعلية وحديقة الأعمال الفنية وواحة الرفاهية وحديقة بطابع إسلامي.

والعاصمة الإدارية قربت تخلص، وكلنا متحمسين نشوف الإنجاز اللي الحكومة حققته، فهي قدرت تحول كل المساحة دي من الصحرا لمدينة كبيرة بتضم كل الخدمات المختلفة، وحولوها بطريقة تبهر العالم كله.

آخر كلمة: ماتفوتوش قراءة: مولات وفنادق سياحية.. أماكن هنلاقيها في العاصمة الإدارية الجديدة

تعليقات
Loading...
Tweet
Share
Share
Pin