الوضع الاقتصادي في مصر بقى أولوية عند المواطن العادي والمسؤولين، وده اللي خلي وزير المالية، محمد معيط، يخرج بسلسلة من التصريحات الصحفية المهمة في وقت حرج بتعيشه المنطقة والعالم، تصريحات بتوضح الوضع الاقتصادي الحالي في مصر وكلام عن الدولار اللي زاد الكلام حوالين سعر صرفه قدام الدولار في الأيام الأخيرة.
الدولار ورغيف العيش وصندوق النقد الدولي
أول التصريحات دي كانت عن الدولار، وهنا نفى الدكتور، محمد معيط، وزير المالية اللي نشره موقع العربية ومواقع تانية من اتخاذ قرارات مهمة خاصة بتوفير الدولار، وقال في مداخلة هاتفية مع الإعلامية، عزة مصطفى، في برنامج “صالة التحرير” المذاع على “صدى البلد”: “العربية قالت كلام مقولتوش وبلغناهم وقالت أصل احنا فسرناها، واللي قلته مسجل وهو إنه خلال 72 ساعة هيبقى في إجراءات لتخفيف أزمة تكدس البضايع بالموانئ”.
معيط أضاف “المالية مع وزارة النقل مع التجارة والصناعة مع البنك المركزي هياخدوا إجراءات لتخفيف أزمة تكدس البضايع بالمواني وهيتم إعلانها قريبًا”.
الدكتور معيط قال إن زيادة سعر الصرف جنيه واحد بيزود الأعباء بقيمة 83 مليار جنيه، وأضاف إن في تحسن مستمر في الموازنة العامة للدولة.
وأكد معيط إن اللي بيتردد عن اشتراطات صندوق النقد الدولي بخصوص إلغاء دعم رغيف العيش والسلع التموينية محض كذب وافتراء، وأشار إن الصندوق متفهم بضرورة وجود شبكة حماية اجتماعية قوية مساندة للفئات الأكتر تأثر بالتضخم، ويدعمها ويدعم الدولة المصرية بخصوصها.
أقدار الله.. الموجة التضخمية برا سيطرة أي حد
الدكتور، محمد معيط، أتكلم عن تأثير الحرب الروسية الأوكرانية وقال إن استمرارها أمر مقلق جدًا، وأضاف وزير المالية إن مصر بتستورد 120 مليون بترول برميل نفط، واللي بتشهد أسعارها ارتفاع وحالة من عدم الاستقرار والموجة التضخمية العالمية خارج سيطرة أي وزير مالية.
ووضح وزير المالية إن جائحة كورونا والحرب الروسية الأوكرانية أثرت على سلاسل الإمداد وزيادة موجة التضخم، وبالتالي أثرت بالسلب على مستوى معيشة المواطن واحتياجاته، وإن المشاكل دي هي مشاكل العالم ومصر جزء من العالم ده.
وأكد الدكتور معيط إن المرحلة صعبة، بس دي أقدار الله سبحانه وتعالى، ومش زيّ ما بيروج البعض إنها أخطاء سياسية لبناء قصص وأوضاع مش حقيقية، ووجه كلامه للمواطن وقال “أوعى تضيع اللي بلدك عملته لإنك لو ضيعته يمكن تندم على اللبن المسكوب”. وناشد معيط الشعب المصري والمواطنين بالحفاظ على مكتسبات الدولة ودعمها في الفترة الحالية.
“الناس برا بيحسدونا على اللي احنا فيه”
معيط أكد إنه خلال الفترة اللي فاتت صدر أكتر من 150 تقرير دولي بينقل صورة سلبية مش بتعكس الحقيقة اللي بنحصل في مصر، وقال معيط في مداخلة هاتفية مع برنامج “بالورقة والقلم” على قناة “تن” إن في أشخاص بتستهدف أمن واستقرار الدولة المصرية وعاوزة تعيد ظروف 2011 من جديد لتشويه اللي بيحصل في مصر من تنمية.
وأضاف محمد معيط: “علينا كمصريين مانضيعش بلدنا واللي برا بيحسدنا على اللي احنا فيه وبيتكلموا عن تواجد استقرار وأمن وتنمية وخلق فرص عمل رغم الظروف الصعبة التي نمر بها”.
“محدش بياخد كل حاجة”
وعلق وزير المالية على شكوى المواطنين من ارتفاع تكاليف المعيشة، وأعتبر إنه أمر طبيعي بتشهده كل دول العالم، وبحسب موقع روسيا اليوم، قال معيط في تصريحات على هامش مؤتمر صحفي إن “تحفظ المواطنين وعدم الموافقة على بعض قرارات الحكومة أو المسؤولين أمر طبيعي، بس علينا النظر للي احنا عليه دلوقتي واللي كنا عليه في السابق ومعدل التحسن الذي وصلت ليه مصر دلوقتي”.
وأكد إن المواطنين كانوا بيشتكوا من تدهور حالة الطرق والبنية التحتية واللي كانت هتاخد فترة زمنية أطول لتنفيذها، وأشار إن المواطن بقى النهارده شاهد على قصر الفترة الزمنية في إصلاح ده، وتابع إن مفيش حد بياخد كل حاجة وأكد إن مصر ما أتأخرتش عن سداد التزاماتها تجاه المؤسسات المالية.
تنشيط السوق
في نفس السياق وضح أستاذ التمويل في جامعة القاهرة، الدكتور هشام إبراهيم، إن الاستثمار الأجنبي المباشر وغير المباشر بيعاني بشكل كبير من بداية الأزمة الأوكرانية على الرغم من إن مصر عندها ثبات ويمكن نمو في قطاعات تانية زيّ تحويلات المصريين بالخارج، لكن الموضوع هيحتاج لضبط للميزان التجاري وضبط أكبر لعمليات الاستيراد وتنشيط موارد الدولة من الدولار. وكمان أشار لمساندة الدول العربية زيّ السعودية والإمارات، وأكد إن الاستثمار بيبع حصص من شركات مصرية سواء حكومية أو قطاع خاص هينشط السوق.