في ٢٠٢٠ ومع جائحة كورونا والعزل المنزلي، المجهود البدني للعديد مننا قل كتير وده بسبب القعدة أو الشغل من البيت. ولكن مع بداية عودة الأندية والأماكن المفتوحة بتجيلنا الفرصة من تاني اننا نعوض كل ما فاتنا في الفترة الأولى من السنة.
ومن النشاطات المفيدة جدًا للجسم واللي بتساعد على إنقاص الوزن هي الجري. لكن مش دي بس الحاجة الوحيدة اللي بنستفيد بيها عن طريق الجري. هنقدملك بعض فوائد الجري وإزاي ممكن يفرق معاك في صحتك وكمان نفسيتك.
هيخلي النوم أحسن
مؤسسة جون هوبكنز الطبية أكدت إن الجري بيساعدك إنك تنام نوم أفضل. أكد الخبراء في المنظمة إن التمارين الرياضية في الواقع بتساعدك على النوم بسرعة أكبر وكمان بتحسن نوعية النوم. وكمان اكدوا إن النوم والرياضة بيمشوا في إتجاهين متوازيين بمعنى إن كل ما مارست الرياضة أكتر كل ما احتجت لجودة أكبر من النوم والعكس صحيح.
بيقلل فرصة أمراض القلب
وفقا للمجلة الأمريكية لأمراض القلب. الجري حتى من 5 لـ 10 دقائق في اليوم، بسرعات بطيئة بيرتبط بانخفاض خطر الوفاة من أمراض القلب والأوعية الدموية بشكل كبير.
بيحسن من النفسية
في دراسة اتنشرت في مجلة الكلية الأمريكية للطب الرياضي أظهرت الدراسة إن قضاء 30 دقيقة على جهاز المشي بس كافية إنها تحسن من الحالة المزاجية لشخص بيعاني من الإكتئاب بعيدًا عن السرعة اللي إنت بتجري أو تتحرك بيها الحركة نفسها لها تأثيرات إيجابية على الشخص وقادر الجري إنه يحسن من موودك العام.
بيساعد في التخسيس
الجري بيحتاج طاقة كبيرة والطاقة الكبيرة دي بتحرق كالوريز كتير. من أكتر الأنشطة اللي بتساعد على حرق الدهون هي الجري فلو إنت عايز تنزل من وزنك فمن ضمن الحاجات اللي هتساعدك رياضة الجري. وفي دراسات كثير أظهرت قد إيه الجري مفيد في حالة إنك عايز تنقص من وزنك.
هيساعد ذاكرتك
في دراسة اتعملت عام ٢٠١٢ في جامعة كولومبيا البريطانية أظهرت إن الجري يساعدك على تقوية الذاكرة وكمان تقضية بعض الوقت على جهاز المشي ممكن يساعد على الحد من أمراض الشيخوخة زي الزهايمر.
بعد ما عرفت كل ده مستني إيه ايه.. يلا! إبدأ وحاول تخلي نشاط مهم زي الجري من ضمن جدولك اليومي أو الأسبوعي.