لوكا عبدالنور.. أول راقص باليه مصري يتأهل لمسابقة عالمية في سويسرا

برغم إن لسنين طويلة كان في ناس كتير شايفين الباليه مخصص بس للمواهب النسائية، ولكن راقصين الباليه الرجال دخلوا المجال ده، وقدروا يثبتوا نفسهم وكمان يشتركوا في مسابقات دولية وعالمية للباليه.. والنهارده نقدر نقولكم إن راقص الباليه المصري – الفرنسي لوكا عبدالنور، بقى رسميًا أول راقص مصري يشترك في المسابقة العالمية بسويسرا “Prix De Lausanne“، والمسابقة دي بتتعمل سنويًا في مدينة لوزان بسويسرا، وبتبقى مخصصة لاستضافة راقصين البالية من عُمر 15 لحد 18 سنة.. وده اللي بيتيح فرصة ذهبية لأي راقص باليه حابب يحترف أكتر في مجال الباليه.. وكتير من اللي فازوا بجوائز في المسابقة دي بقوا دلوقتي أسماء كبيرة وعندهم أكاديميات لتعليم رقص الباليه.

لوكا بدأ شغفه وحبه للباليه يظهر من سن صغير، وده اللي خلاه يقدر ياخد منح دراسية في أكاديميات باليه راقية وعالمية، ودلوقتي ولوكا عمره 17 سنة، بقى مؤهل للاشتراك في المسابقة العالمية اللي راقصين كتير من حوالين العالم بيحلموا يشتركوا فيها، وكمان ده اللي خلاه مؤهل إنه يكون مثال يحتذى بيه في إن الموهبة والنجاح مش مقتصر على سن معين.. لإنه حرفيًا فضل ورا حلمه وقدر يطور من نفسه، لحد ما وصل للمكانة دي، وإن مسابقات راقية وعالمية تستضيفه كأحد متسابقيها.. إحنا فعلًا فخورين بالنماذج المشرفة اللي بتمثل مصر في الخارج في مجالات مختلفة.

آخر كلمة: ماتفوتوش قراءة: “راقص الباليه المصري أحمد يحيي وزوجته هيشاركوا في عرض عالمي بإيطاليا“.

تعليقات
Loading...
Tweet
Share
Share
Pin