لكل سكان الإمارات: التطبيق ده هيحميك إنت وعائلتك من فيروس الكورونا المستجد

من ساعت ما الأزمة دي بدأت، والإمارات العربية المتحدة كانت من الدول الرائدة في السيطرة على إنتشار عدوى “كوفيد-19″، من أول الأماكن المخصصة للتحاليل والمسحات اللي بتدخلها عربيتك لحد تطبيق الحصن الجديد اللي موجود دلوقتي على “جوجل بلاي” و”آبل ستور”. التطبيق اللي صممته وزارة الصحة والوقاية بالإمارات بالتعاون مع دائرة الصحة بأبوظبي ودائرة الصحة بدبي. الآب ده بيمكن مستخدميه من إنهم يعرفوا لو في حالة كورونا موجودة في المحيط بتاعهم عشان يقدروا ياخدوا احتياطاتهم.

الأطقم الطبية في الإمارات السبعة بيشجعوا كل سكان دولة الخليج بإنهم ينزلوا التطبيق عشان يقدروا يحموا نفسهم ويحموا الناس اللي بيحبوها، بالإضافة لده، الحكومة الإماراتية أصدرت بيان بإن اللي مش هينزل التطبيق هيكون مُعرض لغرامة بقيمة 10 ألاف درهم إماراتي.

أول ما تنزل التطبيق وتكتب بياناتك هيظهرلك QR كود، والتطبيق بعدها هيحذرك لو إنت موجود بالقرب من حد حامل للفيروس وفي نفس الوقت هيحافظ على سرية معلومات الطرف المُصاب بـ”كوفيد-19″. الآب بيستخدم تكنولوجيا التعقب الموجودة بالتليفونات الذكية وإشارات البلوتوث عشان يعرفك لو إنت في خطر الإصابة بالعدوى.

دلوقتي في كل الإمارات تحاليل فيروس كورونا مجانية لكل المواطنين بالذات الحوامل ومتحدي الإعاقة وكل اللي فوق سن الخمسين وعمال المنازل وكل من ظهرت عليه أعراض عدوى “كوفيد-19”.

أخر كلمة: نزل الآب وخلي بالك من نفسك ومن اللي بتحبهم!

تعليقات
Loading...
Tweet
Share
Share
Pin