عيد الأم بكره، وطبعًا بنحتار فيه كتير هنجيب إيه هدايا لأمهاتنا لإننا مهما فكرنا ودفعنا وكلفنا، مفيش حاجة تقدر تكفي غلاوة وقيمة الأم عندنا، ده غير إنها كده كده أصلًا مش بتهتم بسعر ولا شكل الهدية، وده إذا كانت بتهتم أصلًا إن كان في هدية خالص، لإن الأم مش بتستنى حاجة مقابل اللي بتقدمه، ولكن مش هننكر إن في أوقات كتير مابيكونش معانا فلوس كفاية نعمل بيها أي حاجة، ففكرنا إننا هنقولكم على كذا وصفة كيكات سهلة وبسيطة تقدروا تعملوها في البيت بمكونات موجودة في المطبخ مش هتحتاجوا تشتروها، خصوصًا إن الأم لما بتشوف أولادها واقفين بيعملولها حاجة في المطبخ بتحس بفخر وإنها متقدرة.
كيك البراونيز
هنحتاج كوباية دقيق، وربع كوباية كاكاو بودرة، وربع كوباية سكر أبيض، و4 معالق لبن مجفف، وكوباية كورن فليكس عادي، و3 معالق بياض البيض، ونص كوباية مياه، ومعلقة صغيرة بيكينج باودر، ومعلقة فانيليا صغيرة.
هنسخن الفرن على حرارة 180 درجة مئوية، ونضرب بياض البيض مع الفانيليا في طبق كبير، ونزود كل المكونات المتبقية ونخلطهم سوا لغاية ما يتماسكوا كويس. بعد كده هندلق الخليط في صينية فرن مستطيلة مدهونة بالزبدة أو الزيت ونسيبها في الفرن لمدة 30 دقيقة. ونسيبها تبرد ونقطعها مكعبات كبيرة.
كيك الزبادي
هنحتاج كوباية ونص من الدقيق، ومعلقتين بيكينج باودر، ونص معلقة ملح، وكوباية سكر، وكوباية زبادي، ومعلقة كبيرة من قشر ليمون حامض مبشور، ونص كوباية زيت نباتي، ونص معلقة خلاصة فانيليا.
هنسخن الفرن على حرارة 180 درجة مئوية، ونخلط الدقيق والبايكنج باودر والملح في طبق، ونخلط السكر مع قشر الليمون الحامض المبشور واللبن الزبادي والبيض والفانيليا لغاية ما المكونات تتخلط كويس.. ونحط الخليطين مع بعض، ونقلب كويس، ونحط الخليط في صينية الكيك متغطية بورق الزبدة، وندخلها الفرن لمدة 50 دقيقة، ونسيبها تبرد ونقطعها.
كيك الجزر
هنحتاج 3 أكواب من الدقيق، وكوبايتين سكر، وكوبايتين جزر متقشر ومبشور، ونص معلقة ملح صغيرة، ومعلقتين بيكينج باودر، ومعلقة صغيرة من القرفة المطحونة، وكوباية زيت، و3 بيضات، ومعلقة فانيليا صغيرة، ونص كوباية لبن، وربع كوباية جوز هند مفروم خشن.
هنخلط الزيت مع البيض والسكر والفانيليا بالمضرب الكهربائي لغاية ما يكون كريمي وهش، ونخلط الدقيق مع البيكينج باودر والملح والقرفة في طبق، ونزود الخليطين سوا ونزود اللبن حبة حبة مع تكملة الخلط بالمضرب الكهربائي لحد ما المكونات تتمزج، ونزود الجزر والجوز ونخلط لحد ما الخليط يتمزج. هندهن صينية الكيك بالزبدة مع رشة دقيق، ونحط الخليط فيها، وندخلها الفرن على درجة حرارة 180 درجة مئوية لمدة 40 دقيقة، وبعد كده نسيبه يبرد ونقطعه.
كيك البرتقال
هنحتاج كوبايتين دقيق، وكوباية سكر، و5 بيضات، ومعلقة بيكينج باودر كبيرة، ورشة ملح، وكوباية زيت نباتي، وكوباية إلا ربع عصير برتقال، ومعلقة فانيليا صغيرة.
هنسخن الفرن على درجة حرارة 180، وهنرش صينية الكيك بالزيت والدقيق. وفي طبق كبير هنخلط الدقيق مع البيكينج باودر ورشة الملح، وفي طبق تاني هنضرب السكر والبيض والفانيليا بالمضرب الكهربائي لغاية ما يكون خليط هش ومتجانس، ونزود الزيت، وعصير البرتقال، ونخلط كويس، وبعد كده نزود الخليطين مع بعض ونقلب كويس، بعد كده نصب الخليط في صينية الكيك، وندخلها الفرن لمدة 40 دقيقة، ونسيبها تبرد ونقطع.
كيك الليمون
هنحتاج 100 جرام من الزبدة وكوباية سكر، و3 بيضات، ومعلقة فانيليا صغيرة، وكوبايتين دقيق، ومعلقتين بيكينج باودر صغيرين، وربع معلقة ملح صغيرة، ومعلقتين كبار الليمون المبشور، ونص كوباية عصير ليمون.
هنضرب الزبدة مع السكر لحد ما تكون كريمية، ونزود البيض واحدة ورا التانية، ونضربهم سوا بعد كده نزود الفانيليا. وعلى جنب هنخلط الدقيق مع البيكينج باودر مع الملح.. بعد كده هنزود عصير الليمون لخليط البيض ونقلب، ونزود خليط الدقيق تدريجيًا ونخلط كويس، ونزود الليمون المبشور ونقلب كويس، ونحط الخليط في صينية الكيك المرشوشة بالزيت والدقيق في الفرن على درجة حرارة 180 درجة مئوية لمدة 45 دقيقة، ونسيبها تبرد ونقطعها.