كل حاجة محتاجين تعرفوها عن كرة القدم الأمريكية، وأماكن لعبها في مصر

رياضة كرة القدم الأمريكية موجودة هنا في مصر بقالها 6 سنين، والرياضة مش مقتصرة بس للرجال، ولكن في كمان في نسخة منها للبنات. قدمها اتحاد كرة القدم الأمريكية المصري (EFAF) لمجتمعنا في 2014، وهم المسئولين عن كل تنظيم متعلق بالرياضة.

كرة القدم الأمريكية ظهرت في الأول في الولايات المتحدة الأمريكية، وهي أكتر لعبة شعبية، ومشهورة هناك. ممكن تبان أنها صعبة الفهم، واللعب، لكن في الحقيقة هي سهلة جدًا. الفريق بيكون مكون من مهاجمين ومدافعين، وكل لاعب في كل مجموعة بيكون ليه دور ومهمة مختلفة، زي لاعب الوسط (quarterback) اللي مسئول عن حدف الكرة، أو تمريرها للاعب الركض الخلفي (running back).

الماتش بيكون متقسم ل4 أشواط، كل شوط ربع ساعة، والفريقين بينزلوا الملعب، ويلعبوا لمدة ساعة متوقفة، يعني الساعة بتقف ما بين الأشواط، والوقت المتقطع، والساعة مش بتعد غير الوقت اللي بيلعبوا فيه، والماتش ممكن يفضل شغال لساعات.

الفريق المهاجم بيكون مكون من 11 لاعب بيحاول يسجل هدف (touchdown) اللي بيتحسب ب 6 نقط، بحدف الكرة للمهاجمين، أو تمريرها، والجري بيها لآخر الملعب (end zone)، اللي بياخد 100 ياردة، والمهاجمين بيكون ليهم 4 محاولات (4 downs)، وكل لما يوصلوا لداون، بيتجددلهم محاولاتهم ال 4، ولو ماقدروش يحركوا الكرة في ال 4 محاولات دول، بيبدلوا، فيخرجوا من الملعب، ومدافعين فريقهم ينزلوا، ومهاجمين الفريق التاني كمان.

ومهمة المدافعين زي ظهير الخط (linebacker)، والأمان (safety)، بتكون إنهم يدافعوا عن منطقتهم، فبيمنعوا الفريق اللي قصادهم من التسجيل، أو يمنعوا الكرة من أنها تتمسك من الأول. ولو حد من المدافعين مسك الكرة بدل مهاجمين الفريق التاني (interception)، بيجري بيها لآخر الملعب، ويقدر يسجل (pick 6)، ولو مسجلش، بيخرجوا من الملعب، ويبدلوا، وينزل مهاجمين فريقهم، ويحاولوا يكملوا الهجمة.

كتير من الناس في أمريكا حاولوا يمنعوا اللعبة، واعترضوا عليها لأنها عنيفة، وأحياناً مميتة، علشان كدة بنلبس أدوات حماية زي واقي الأكتاف، والأفخاذ، وخوزة، ولبادات للركب. ولكن الناس بتحبها جدًا، وبيعتبروها من العادات والتفاليد، وبيقولوا أنها كناية عن الحرب، وأن اللعبة بتمثل الإصرار، والعزيمة، والايمان بالنفس، وتحديها عقليًا، وجسديًا، والثقة في أنك تقدر تكمل بالكرة للآخر مهما كان قد ايه الطريق مسدود قدامك.

وعندنا في مصر في 8 فرق في كل أنحاء القاهرة، والجيزة، وهما الإيجلز، والبيرز، والوولفز، والتايتنز، والثاندر، والتايجرز، والهيلهاوندز، والووريورز. وكلهم عندهم فرقة للرجال، وفرقة للبنات اللي بيلعبوا نسخة مختلفة عن كرة القدم الأمريكية للرجال في حاجة واحدة بس، وهي أنها مفيهاش تلامس، بتعتمد على لبس حزام في الوسط ملزوق فيه أعلام رفيعة، ومهمة الفريق أنه يشد العلم ده لتوقيف الكرة، أو اللاعب. وكل آخر سنة الاتحاد بيقدم دوري للبنات والرجال.

آخر كلمة: لو عايز تجرب رياضة جديدة، وشايف أنك تقدر، شوف أقرب تجربة أداء، وقدم

تعليقات
Loading...
Tweet
Share
Share
Pin