مصر بقت وجهة لكل الاتحادات الدولية في كل الألعاب الرياضية، ونجحت إنها تكسب ثقة الاتحادات الدولية الكبيرة وبتنظم بطولات عالمية على أرضها، رغم وجود منافسة، لكن مصر قدرت تفوز بتنظيم بطولة كأس العالم لكرة اليد 2021، في النسخة الـ 27 من تاريخ البطولة، واللي هتبدأ النهارده، وسط تحدي كبير بسبب ظروف فيروس كورونا المستجد، لكن البطولة هتقام بس بدون جماهير، ودي مش أول مرة مصر تستضيف البطولة، لإنها استضافت البطولة في 1999.
ومن أصل 32 منتخب في البطولة، بيشارك فيها 6 منتخبات عربية هما: مصر وتونس والمغرب والجزائر والبحرين وقطر، وده عدد كبير لكنه مش أول مرة يحصل، ففي نسخة 2003، شارك العدد ده من المنتخبات العربية في نسخة واحدة، وده رقم قياسي لعدد ممثلي الكرة العربية في نسخة واحدة بمونديال اليد، وبمناسبة مشاركتهم السنة دي، تعالوا نفتكر إنجازات المنتخبات دي في النسخ اللي فاتت من البطولة.
مصر
صاحبة الأرض، المنظمة للبطولة السنة دي، ومن أكتر المنتخبات العربية اللي بتحقق إنجازات في كرة اليد، المنتخب داخل البطولة السنة دي وهو محافظ على مركزه كأكتر منتخب عربي مشارك في البطولة بـ 16 مشاركة، ده غير إنه الأول عربيًا اللي بيشارك في المونديال العالمي من وقت بطولة 1964، وحصل ساعتها على المركز 14، وبداية من مونديال 1993، ماغابش المنتخب المصري عن البطولة ولا مرة لحد دلوقتي.
تونس
المنتخب التونسي أحد أقوى المنتخبات على المستوي العربي والقاري في كرة اليد، وليه سجل مميز في البطولة، منها إنه تأهل للدور ربع النهائي في 9 مرات من 14 مشاركة في المونديال، ويعتبر إنجاز 2005 هو الأفضل ليه بعد ما احتل المركز الرابع في البطولة اللي أقيمت على أرضه وقتها، بعد الخسارة من فرنسا في مباراة تحديد المركز التالت والرابع بنتيجة 26-25.
المغرب
بعد غياب أكتر من 14 سنة، منتخب المغرب بيشارك السنة دي في مونديال كرة اليد، وتعتبر الميدالية البرونزية لبطولة الأمم الأفريقية في تونس هي أبرز إنجاز في تاريخ المغرب لكرة اليد، علشان كده مستنيين منهم إنجازات أكبر البطولة دي ومنافسة أشرس.
اقرا كمان: بعد “إرفع إيدك”، تعالوا نشوف أغاني الافتتاح لكأس العالم لكرة اليد في الدول العربية.
الجزائر
منتخب الجزائر لسه بيبحث عن مركز يليق بتاريخ كرة اليد الجزائرية، وده من خلال المشاركة الـ 15 ليه في البطولة، لكن المنتخب الجزائري هو الأفضل في الفوز بعدد البطولات الأفريقية المتتالية، بعد ما كسبها خمس مرات متتالية في 1981، و1983، و1985، و1987، و1989.
البحرين
المنتخب البحريني هو صاحب السجل الأضعف بين الفرق العربية المشاركة، ودي تعتبر المرة الرابعة للمنتخب البحريني اللي يتأهل فيها بعد نسخة السويد 2011، ونسخة فرنسا 2017، وألمانيا والدنمارك 2019، وبنستنى من المنتخب منافسة أقوى على المراكز في بطولة السنة دي.
قطر
المنتخب القطري صاحب أكبر إنجاز عربي في سجلات الاتحاد الدولي لكرة اليد، ودي المشاركة التامنة ليه في بطولة العالم لليد، بعد ما فاز بالأمم الآسيوية في المباراة النهائية قدام كوريا الجنوبية بنتيجة 33-21، والمنتخب القطري حقق قبل كده المركز التامن في مونديال فرنسا 2017، وده أكبر إنجاز في مشاركة خارجية في بطولة العالم بعد الإنجاز غير المسبوق بالحصول على مركز الوصيف في مونديال قطر 2015.