في يوم السياحة العالمي: جمعنالكم مدن عربية للسياحة التراثية والريفية الهادئة

اليوم العالمي للسياحة السنة دي مختلف في كل حاجة عن أي سنة فاتت بعد شهور من توابع انتشار فيروس الكورونا حول العالم وحالة من الركود في مختلف القطاعات السياحية سواء المحلية أو الدولية. وشعار اليوم ده السنة دي هو “السياحة والتنمية الريفية” لتشجيع الرحلات السياحية خارج المدن الكبرى، وتشجيع السياحة في المدن التراثية والريفية، اللي مليانة بالتراث الثقافي والطبيعي.

وعلشان كدة جمعنالكم قائمة بأجمل المدن العربية اللي بتتمتع بالطبيعة الريفية الهادئة بالإضافة للطبيعة التراثية والأماكن الآثرية.

الفيوم 

مصر فيها أماكن ومدن كتير لسة بتتمتع بهدوء الحياة الريفية البسيطة البعيدة عن صخب العاصمة مناسبة للاسترخاء والاستجمام في مناخ صحي بعيد عن التلوث. ومن الأماكن دي مدينة الفيوم، اللي بتعتبر من أكتر المدن المصرية اللي بتتمتع بأجواء ريفية طبيعية هادية، ومن أكبر مميزاتها إنها بتجمع بين البيئة الزراعية والساحلية والصحراوية في طبيعة متناغمة، وكمان بتتميز بموقعها اللي يعتبر سهل الوصول إليه، وبتبعد عن القاهرة حوالي 100 كم.

ومن أشهر الأماكن السياحية هناك بحيرة قارون، وشلالات وادي الريان، فالفيوم بتتميز ببحيرات فريدة من نوعها، وبتتمتع بحياه برية متنوعة. ولو زيارتك للفيوم هتكون في الوقت ده من السنة (شهر سبتمبر) هتمر بتجربة ومغامرة جديدة كليًا، لأن سبتمبر بيعتبر أكبر موسم لصيد الطيور المهاجرة في الفيوم.

الصويرة

الصويرة من أجمل المدن اللي لسة محتفظة بالحياه التراثية للمغرب، وبيُطلق عليها “جوهرة المغرب الخفية” اللي بتتميز بوجود شواطئ رائعة بتعتبر محور الترفيه في المدينة، وبيتمارس فيها الرياضات المائية المختلفة زي رياضة ركوب الأمواج والتجديف.

كمان المدينة بتتميز بمعمار مختلف، لأنه خليط من العمارة القديمة والمعاصرة، وبالإضافة للساحات والأسوار التاريخية اللي بتحيط بيها. وكمان في مدينة تاريخية قديمة في الصويرة بتعتبر ضمن مواقع التراث العالمي باليونسكو، وبتضم أسواق مميزة بتعرض كل المنتجات المحلية اللي بتعبر عن التراث الفني للمغرب، فبتعبر الصويرة مدينة لعشاق الطبيعة والرياضة وكمان الثقافة.

أبها

مدينة أبها ليها طابع مختلف في السعودية، وده طبعًا بعيد عن الفكرة المطبوعة في العقول إن السعودية بتتميز بالسياحة الدينية بس، فمدينة أبها ذات جذب سياحي مختلف لأنها بتضم مواقع آثرية سياحية وتراثية زي القلاع المنتشرة على قمم جبال المدينة اللي بيُطلق عليها “عروس الجنوب” أو “مدينة الضباب”. وبتعتبر أبها من أجمل الوجهات السياحية الصيفية وده لإنها بتتمتع بطبيعة جذابة وجو معتدل، بالإضافة لمعالمها التاريخية والآثرية، وكمان الأسواق الشعبية اللي بتوفر كل المنتجات اللي بتشتهر بيها المدينة.

ومن أهم المعالم السياحية في أبها منتزه أبو خيال، اللي بيتميز بالمساحات الخضراء الواسعة اللي بتطل على المدينة، ده بالإضافة لجبل السودة، أعلى قمة جبلية في المملكة العربية السعودية، بارتفاع بيتعدي التلت آلاف متر.

جونيه

عن: Tour Flag

جونيه أو “مدينة الليمون الساحرة” في لبنان، بتتميز بطابع سياحي جميل، وبتضم في كل بقعة منها مزارات سياحية مختلفة. وهي واحدة من أجمل المدن الساحلية اللبنانية اللي بتتميز بأجواء هادية رومانسية مناسبة للاسترخاء والاستجمام النابع من انتشار زراعة الليمون فيها. وكمان بتتميز المدينة بمرفأ صغير بيربطها بمناطق كتير في العالم، وده ساعد على إنه يكون ليها زوار من كل جهات العالم.

عن: Elnashra

ومن أشهر المعالم السياحية في جونيه تلفريك حريصا، اللي بيعتبر وجهة سياحية في حد ذاته، وبياخدك في جولة بين المناظر الطبيعية لخليج جونيه وقمة جبل حريصا اللي بيضم واحد من أهم المعالم السياحية في لبنان وهو مزار سيدة لبنان، اللي بيعتبر من أهم المعالم الدينية للمدينة، وبيعتبر مكان مقدس بيقصده الآلاف.

عجمان

عن: Bayut

مدينة إماراتية بتعتبر مقصد لكل اللي بيحبوا الاستجمام والهدوء في رحلة سياحية مليانة بالأماكن الثقافية والتاريخية، وكمان الشواطئ المميزة بالرمال البيضاء اللي هتستمتع أكيد بيها لو بتحب تقضي وقتك على الشاطئ في الرمال المختلفة من نوعها والاستمتاع بالشمس، ولو إنت من محبي زيارة المواقع الآثرية، مدينة عجمان هتكون بردو الوجهة المناسبة لرحلتك.

ومن أهم المعالم السياحية في المدينة، متحف عجمان اللي كان في الأصل قلعة بيرجع تاريخها للقرن ال 18، وبقت دلوقتي متحف بيضم معروضات بتركز على الحياة المحلية التقليدية، بالإضافة للصور اللي بتوضح نمط الحياه في المدينة، والاسكتشافات الآثرية من المواقع المجاورة، وكمان معرض للأسلحة الإماراتية، ومعرض آخر للمخطوطات.

وبالإضافة لمتحف عجمان، المدينة مميزة بالداو يارد، وده واحد من أكبر مراكز بناء السفن الشراعية في العالم، وبيقع على الجانب الشمالي للمدينة، وبيتم صناعة المراكب الشراعية فيه بالطرق والأدوات التقليدية اللي تناقلت عبر الأجيال.

آخر كلمة: متفوتش زيارة المدن الريفية والتراثية، وقولولنا في التعليقات إيه هي مدينتكم المفضلة…

تعليقات
Loading...
Tweet
Share
Share
Pin