في يوم السلام العالمي.. سباحين مصر هيطلقوا أكبر رسالة سلام للعالم من قناة السويس

من قناة السويس للعالم كله، وبحضور طقم تحكيم دولي من موسوعة جينيس للأرقام القياسية، هيقوم 550 سباح مصري بتشكيل أكبر شعار للسلام العالمي على سطح مياه قناة السويس في الاسماعيلية يوم 21 سبتمبر الجاي اللي بيوافق يوم السلام العالمي. والهدف من الحدث ده هو إرسال رسالة سلام لكل شعوب العالم، وترسيخ أسس السلام العالمي، ورفض العنف، ووقف إطلاق النار، ونشر ثقافة التعاطف والرحمة، خصوصًا في ظروف مواجهة الوباء.

عن: freepic

الحدث ده هيكون تحت رعاية وزارة الشباب والرياضة، والاتحاد المصرى للغوص والإنقاذ، وهيئة قناة السويس. وهو بيهدف للحصول على رقم قياسي جديد، واللجنة المنظمة للحدث صرحت إن عدونا كلنا السنة دي واحد وهو فيروس الكورونا اللي بيهدد صحتنا وأمننا، واللي أثبت إننا مش أعداء لبعض، وأثبت كمان إن اللي بيحصل في أي مكان علي الأرض ممكن يأثر علي الناس في كل مكان.

عرض السباحين المصريين هيكون بقيادة القبطان المصري ولاء حافظ اللي دخل موسوعة جينيس بأطول غطسة في العالم سنة 2015، لكنه أصيب بشلل رباعي بعدها بسنة بسبب حادثة مرورية بس قرر إنه ميستسلمش لمرضه، وقدر القبطان ولاء إنه يرجع لرياضته المفضلة.

آخر كلمة: بقية تفاصيل الحدث هيتم إعلانها في مؤتمر صحفي قريب جداً، استنوها…

تعليقات
Loading...
Tweet
Share
Share
Pin