النهارده بيوافق يوم ميلاد الفنانة الكبيرة نادية الجندي الـ 75، بدأت نادية الجندي مشوارها الفني من سن صغير جدًا، بعد ما كسبت في مسابقة جمال، وخدت بعدها دور صغير في فيلم يوسف شاهين التاريخي “جميلة”، ومن بعدها انطلقت في مشوار فني طويل قدمت فيه نادية حوالي 60 فيلم و8 مسلسلات.
بالنسبة لحياتها الشخصية، فهي اتجوزت مرتين، الأولى كانت من الممثل الراحل عماد حمدي اللي كان الفارق العمري بينهم كبير جدًا واستمرت لمدة 12 سنة، وأنجبت منه ابنها الوحيد هشام، والمرة التانية كانت من المنتج محمد مختار اللي معظم أفلامها الناجحة كانت بتعملها معاه، واستمر لمدة عشرين سنة، وتم الانفصال بهدوء.
وتميزت نادية الجندي بأدوارها اللي كانت بتمثل فيهم المرأة القوية في أفلام الجاسوسية وكمان تنوعت أدوارها في أفلام الجرائم، فتقديرًا لمشوارها الفني الكبير والمهم، تعالوا نفتكر مع بعض أهم الأعمال اللي قدمتها نادية في خلال الـ 60 سنة اللي فاتوا.