في رمضان: نصايح وأكلات صحية للأطفال تساعدهم على الصيام

للأطفال اللي بتبتدي تتعود على الصيام، محتاجين أكلات بعناصر غذائية مفيدة تعوض جسمهم بعد الصيام، علشان كده الأمهات لازم تهتم بأنواع الأكلات على الفطار، خصوصًا للأطفال اللي في سن لسه بيتعودوا على الصيام، علشان يكون فطار صحي ومغذي وفيه العناصر الغذائية المختلفة من نشويات وبروتينات وفيتامينات، وفي نفس الوقت بوصفات يحبوها.

التمر

عن: mosoah

معظم البلاد العربية متعودين على الفطار إنهم يكسروا صيامهم بالتمر، لإن فوائده الغذائية كتير، وعلشان كده من السهل نعوّد الأطفال إنهم ياكلوا تمر على الفطار. التمر هيعوّض نقص السكريات في جسمهم طول فترة الصيام، ده غير الفيتامينات والمعادن الموجودة فيه، وهيحميهم من الإصابة بالأنيميا وفقر الدم.

سلطة

عن: fay3

مش مجرد طبق مقبلات أو حاجة جنب الأكل، طبق السلطة من أهم الأطباق على السفرة خصوصًا في فطار رمضان، ولازم تحتوي على أنواع مختلفة من الخضار بعناصر غذائية مختلفة علشان تفيد جسم الأطفال وتدي لهم الفيتامينات اللي محتاجينها.

الشوربة

عن: webteb

بأنواعها المختلفة، سواء شوربة الفراخ بالكريمة، شوربة اللسان عصفور وشوربة الخضار، أو حتى شوربة العدس. طبق مهم وأساسي يبتدي به الطفل فطاره وهيوفر له عناصر غذائية مهمة فقدها في الصيام.

البروتين

عن: hayatk

بكل أنواعه ووصفات طبخه، في الفراخ واللحوم وحتى الأسماك، ممكن تنوعي في طرق طبخ الطبق الرئيسي لوجبة الفطار حسب رغبة الأطفال وتفضيلهم الشخصي، لكن المهم إنهم يعتمدوا على البروتين في طبقهم الرئيسي، ومن الأحسن تكون طريقة طبخه كمان صحية من غير قلي.

تجنب السكريات المصنعة

عن: alghad

للأسف، انتشار معتقد إن الجسم محتاج يعوض السكريات اللي خسرها في فترة الصيام، فممكن ناكل ونشرب أي حاجة مسكرة، فكرة غلط بتخلينا ندخل لجسمنا سكريات مش هايتخلص منها بسهولة وهتضر أكتر ما هتنفع، علشان كده ضروري نتجنب العصاير المصنعة والمشروبات الغازية ونبدلها بعصاير طبيعية خصوصًا للأطفال.

عارفين إن معظم الأطفال دلوقتي بيحبوا الأكل السريع، أو بيعتمدوا على نوع معين في الأكل ومش بيحبوا باقي الاختيارات، وفي كمان اللي مش بيحبوا الأكل اللي متعودين عليه زي الشوربة والسلطة، بس لازم نخليهم يعتمدوا على العناصر الغذائية دي علشان الفوايد المختلفة فيها لجسمهم، حتى لو اخترعنا في طرق عملها ونوعنا بأنواع الخضار والفاكهة والوصفات اللي بيحبوها، المهم إنهم ياكلوا الأطباق دي لفطار صحي.

آخر كلمة: ماتفوتوش قراءة: مش حاسس بدخلة رمضان؟ خطوات بسيطة تقولك ازاي تستقبل الشهر الكريم

تعليقات
Loading...
Tweet
Share
Share
Pin