في حب السينما المصرية: قايمة أولية بأفلام الأبيض والأسود اللي لازم تشوفها

بدون مبالغة نقدر نعتبر السينما المصرية واحدة من أحسن الحاجات اللي حصلت في التاريخ، ولقب “هوليود الشرق” مش من فراغ، بالذات إن تأثيرها تجاوز الحدود من زمان جدًا وانتشر في كل مكان في الوطن العربي. سنين طويلة من قصص الأفلام اللي بتشتبك مع الواقع والسياسة والاجتماع وحتى الفانتازيا، وعناصر كلها أسماء حفرت اسمها بحروف من دهب في مجالها كأيقونات لفن التصوير والإخراج والصوت والإضاءة والتأليف والسيناريو والحوار.

كنز الإبداع ده جذوره ضاربة في أفلام الأبيض والأسود اللي أسست للتاريخ ده، وهنا ومن وجهة نظري الشخصية، هطرح أفلام قديمة هتحببك في الفترة دي وأفلامها.

“الدواء به سم قاتل”.. فيلم “حياة أو موت

من أكتر الجمل الدارجة بين الناس هي الجملة دي “الدواء به سم قاتل”، وهي اللي أتكررت في فيلم “حياة أو موت”. فيلم “حياة أو موت” لمُخرجه كمال الشيخ بيعرفنا على حياة أحمد إبراهيم المواطن المصري العادي اللي بيعيش سنة 1954، في منطقة دير النحاسين مع طفلته. أحمد بيبدأ في الشعور بمرضه القديم اللي بيحتاج لعلاج مركب في الصيدلية، فيببعت بنته تجيبه وبنعيش مع أبطال الفيلم ده قصة رحلة مثيرة جدًا، كلها صعوبات ومفارقات، قصة رحلة حصول على دواء يمكن هي الأشهر في السينما.

القصة نابعة من البيئة المصرية ومشاكلها ومن تركيبة الشعب المصري اللي ليها علاقة بأخلاقه وطبعه وردود فعله، وبين التكامل بينه وبين بعضه وبين السلطات في مهمة إنسانية بامتياز كانت بتتفق مع أهداف نظام الحكم في الفترة دي من غير أفورة.

عماد حمدي ومديحة يسري في لقطة من الفيلم – عن شهريار النجوم

لوسي ابن طنط فكيهة.. فيلم “إشاعة حب”

فيلم مصري كوميدي كلاسيكي، من أنجح أفلام السينما المصرية والأعلى شعبية لحد دلوقتي رغم إنه أتعرض لأول مرة في 21 نوفمبر سن 1960، فيلم “إشاعة حب” مقتبس عن مسرحية “حديث المدينة ” لجون إيمرسون وأنيتا لوس، كتب له السيناريو والحوار محمد أبو يوسف وأخرجه فطين عبد الوهاب.

قدم فطين عبد الوهاب فيلم” إشاعة حب” وأقامه على فكرة بسيطة، وهو من أهم أفلام المرحلة التانية في مشواره بعد مرحلة أفلام إسماعيل يس، وبسبب نجاح الفيلم الكبير يُعتبر على رأس قائمة أفلام فطين عبد الوهاب.

الفيلم بالكامل متصور في بورسعيد، وبيدي رسالة للجمهور إن الشائعات والفضايح فعل فطري حتى إن البشر أحيانًا بيخترعوها علشان يصدقوها. الفيلم شهد ظهور شخصية لوسي ابن طنط فكيهة اللي عملها الفنان جمال رمسيس، واللي قدم مشاهد غاية في الروعة والكوميديا مع الفنان الكبير يوسف وهبي.

اشاعة حب تحفة فنية مش تتكرر – عن في الفن

نورماندي تو.. فيلم “ابن حميدو”

توليفة سينمائية عبقرية اجتمع فيها معظم النجوم في الوقت ده، زيّ أحمد رمزي وإسماعيل ياسين وهند رستم وزينات صدقي وعبدالفتاح القصري وتوفيق الدقن، يُعتبر فيلم “ابن حميدو” للمخرج فطين عبد الوهاب واحد من أحسن أفلام الكوميديا المصرية، وهو من إنتاج سنة 1957.

قصة الفيلم بسيطة؛ قصة اتنين من رجال الشرطة، وهما إسماعيل ياسين وأحمد رمزي، في مهمة سرية للقبض على عصابة تهريب مخدرات في منطقة العين السخنة والسويس، وفي المهمة دي بتنشأ علاقات عاطفية بين ابن حميدو وحميدة، وحسن وعزيزة.

 ورغم بساطة القصة، إلا إن أحداث الفيلم بتكشف عن مواقف وشخصيات ثرية، وهي اللي خلته واحد من علامات السينما المصرية.

اسماعيل ياسين واحمد رمزي ورياض القصبجي ( الشاويش عطية ) في فيلم ابن حميدو – عن بينترست

فيلم “في بيتنا رجل”.. بين الحياة والحرية

ارتبطت أعمال إحسان عبد القدوس بالواقع المصري ومع صعود الخطاب التحرري واستجابة الطبقات الشعبية والوسطى للخطاب، فكانت أعمال عبد القدوس نموذج واضح لده في فترة معينة، فترة كان فيها حلم سياسي بنموذجه الاشتراكي والاجتماعي.

“في بيتنا رجل” هي الرواية اللي اتنشرت سنة 1957، وكانت بتعبر عن مرحلة ما بعد 1952، ولقيت صدى كبير لما صدرت في الوسط الثقافي والشعبي المصري. الرواية والفيلم فيهم عدد من الشخصيات اللي أتميزت بوطنيتها ورومانسيتها الثورية اللي بتسعى لتحرير البلاد من المستعمر الإنجليزي وأعوانه، وهو الجانب المضطرب اللي عاشه إحسان في مرحلته الجامعية وقراءاته المستمرة لنهايات الحرب العالمية التانية على الصعيد الاجتماعي وتصاعد أفكار التحرر الوطني من الاستعمار.

عمر الشريف ورشدي أباظة وحسن يوسف في فيلم في بيتنا رجل – عن في الفن

فيلم “أم العروسة”.. فيلم بنكهة مصرية

الأفلام الاجتماعية هي أكتر نوعيات الأفلام اللي بيفضل الجمهور مشاهدتها، خصوصًا اللي بتتعلق بحياة الأفراد وعلاقاتهم ببعضهم، كمان المشاكل اللي بيواجهوها مع بعض، بمعنى إن الخط الاجتماعي أو الإنساني في السينما بشكل عام وفي السينما المصرية بشكل خاص من الحاجات اللي بيحبها الجمهور، وكتير مننا بيحرص إنه يشوف الفيلم أكتر من مرة، ومن أشهر المخرجين اللي أخرجوا النوعية دي من الأعمال الدرامية هو المخرج عاطف سالم.

“أم العروسة” من أنجح أفلام عاطف سالم وأبرزها وأكترها شهرة عند المشاهدين، وهو مبني على قصة للكاتب الكبير عبد الحميد جودة السحار، اللي كتب الحوار برضه وكتب له السيناريو عبد الحي أديب، وقام ببطولته عدد كبير من النجوم على رأسهم عماد حمدي وتحية كاريوكا وسميرة أحمد ويوسف شعبان وحسن يوسف وغيرهم. ويُعتبر “أم العروسة” من أنجح أفلام عاطف سالم، وهو من نوعية الأفلام الاجتماعية أو اللي ممكننطلق عليها مصطلح أفلام الأسرة.

تحية كاريوكا وعماد حمدي في مشهد من فيلم “أم العروسة” – عن السينما

أخر كلمة: ماتفوتوش قراءة: الهزايم الكبيرة والأحلام الضائعة في سينما خيري بشارة في ذكرى ميلاده

تعليقات
Loading...
Tweet
Share
Share
Pin